Minister Ruatkima'n SIRDPR a tlawh

Rural Development (RD) minister Lalruatkima chuan January 25, Zirtawpni zan khan Durtlanga State Institute of Rural Development & Panchayati Raj (SIRDPR) hmun a tlawh a; Mizoram district hrang hranga SIRD hnuaia faculty-te leh SIRD, Dur­tlanga thawkte fuihna thu a sawi.

Lalruatkima chuan, Mizorama thingtlang lam leh khawsak harsa zawkte tan SIRD hnathawh a ṭangkai thu leh ram hmasawnna atan thingtlang tihhmasawn a pawimawh thu a sawi a; chutiang atan chuan SIRD hnathawh dan ṭha a tih thu sawiin, thawktute chu nasa zawka ṭan la turin a chah.

RD Minister chuan, mihringte chu inzir reng ngai an ni tih sawiin, "Hmasawn turin mipui tam zawk zirtir a, nunphung tam tak thlakthleng theitu pawimawh tak chu SIRD hi a ni a, thingtlang hmasawnna kawngah a sûlsutu pawimawh tak in ni a, neitu thinlung pûin hna thawh a ngai. Mithiam rual awm khawm in nih angin, Pathian leh he ram tan in thiamnate nasa lehzuala hmang turin ka ngen che u a ni," a ti.

Minister Lalruatkima chuan, sorkar kal tawhte hnathawh Mizoram tana ṭha tur chu chhunzawm a nih zel tur thu leh, ram tana ṭha ber zel tura rorelna kalpui a nih tur thu a sawi bawk.

RD Minister hi SIRD direc­tor Maria CT Zuali'n an hna­thawhte a hrilhfiah a; minister viak ṭha leh principle nei ṭha tak RD department-in an nei chu malsawmna a nih thu a sawi. Lalruatkima hian SIRD campus leh building hrang hrangte a fang kual a ni.