MLA-in Laipuitlang mamawh a enfiah
Aizawl North-II bialtu MLA Dr Vanlalthlana chuan January 25, Zirtawpni khan a bial chhunga Laipuitlang a tlawh a, Laipuitlang khawtlang mamawh hrang hrangte zâwtin, an mamawhte a hmunah a en.
Dr Vanlalthlana chuan, kalphung tharin Mizoram sorkar chu kal lo mah se, ZPM MLA-te chuan an bial ṭheuhah kalphung thara bial leh ram tana thawh an tum thu sawiin, duhsak leh thlei bik nei loa a bial chhung mipuite mamawh a theih ang anga puih a tum thu a sawi.
A bial chhung veng hrang hrang mamawhte chu a hmuna kal chilha en zel a tum thu sawiin Vanlalthlana chuan, "A theih chin chinah Local Development Committee din a, chu committee kaltlanga a pawimawh dan indawta hna pawh dik leh ṭha taka thawh tum a ni," a ti.
Dr Vanlalthlana hian Laipuitlang mamawh hrang hrangte a hmunah a en a; Laipuitlang Primary School kawt leimin thenfai leh a dâwlna siam dan tur te, community hall chei ṭhat dan tur te, Laipuitlang leimin aṭanga tuihâwk luan kawr chunga Ramhlun panna tur step siam dan tur te, leimin thei vênna atana retaining wall siam dan tur te, tuihâwk luan kawr siam dan turte a enfiah a ni.