KHAWTHLIR

MNF-in zalenna an sual ṭan tirha bul ṭantute zinga mi L Malsawma Colney (88), Biate chu nimin tlai dar 4:50 khan lung lam ṭhat loh avangin Biate damdawi-inah a thi a, vawiinah an chenna inah vui a ni ang. 

Republic Day, January 26 khan Lammuala hun hman zawhah Raj Bhavan tual (circular lawn)-ah Governor Kummanam Rajasekharan chuan thingpui ruai - At Home a buatsaih. He hunah hian sàwm bik mi eng emaw zat tel mah se, Joint NGO-in Republic Day an boycott avangin kum dang ai chuan tel an tlém hle a ni.

Lammual, Aizawla Republic Day lawmna parade-a commander chu DSP C Lalsawta niin, second commander chu DSP Lalpianthanga a ni a; armed contingent paruk leh band party pathum an tel. Parade zingah hian 5th. IR Battalion chu pakhatna an ni a, 3rd. Battalion MAP pahnihna niin, 1st. Battalion MAP pathumna an ni.

Mizoram Florists' Association chuan vawiin aṭang hian City Centre-ah Florist Fair an buatsaih dawn a, MJA President-in a hawng ang. Fair hi February 1, 2019 thleng neih a ni dawn a, chhim turin Mizoram Florists' Assn chuan mi zawng zawng an sáwm a ni.

Kristian Ṭhalai Pawl (KṬP) pastor bial hrang hrangte chuan January 25-27 chhung khan bial KṬP conference an hmang a, nizan khan a ṭiak. Bial KṬP conference-ah hian Inrinni khan rorel inkhawm neih a ni a, an thurel zinga Mizoram pum kaihhnawih thilte chu Centrall KṬP-ah an thlen dawn a ni. KṬP bial conference hi rokhawlhna vanga hmang thei rih lo pastor bial tlem azawng an awm bawk.

UPC (North East India)-a Aizawl East district hnuaia bial hrang hrangte chuan January 25-27 chhung khan bial PYD inkhawmpui an hmang a, nizan khan a ṭiak. Inkhawmpuiah hian Inrinni khan bial chhung inawpna leh district-a lut turte ngaihtuahin rorel inkhawm an nei.