Damdawi-in ṭha tak kan neih theih nan Theihtawp chhuah a ni ang - Health Minister

Aizawl Civil Hospital (ACH)-in MJA member-te puala free health check-up an buatsaih chu nimin khan ACH Medical Superintendent conference hall-ah khâr a ni a; khârna inkhawm hmanpuitu Health & Family Welfare minister Dr R Lalthang­liana chuan, Mizoramin damdawi-in ṭha tak a neih theihna atan theihtawp chhuah a nih tur thu a sawi. 

Health Minister chuan, ACH a phuisui lehzualna turin MRI neih ngei a ṭul tih sawiin, "MRI hi a to khawp mai, mahse, ACH hi civil hospital mai ni lo, state hospital a ni. Extension tih dan tur ngaihtuahnaah a awm a, tih theih a nih chuan mipuiin an chhawr ṭangkai leh zual dawn. Damdawi-in a ṭhang tih ka hmu a, lawmawm ka ti hle a ni," a ti.

Hmanraw ṭha tak tak awm mah se, a enkawltu lam an indaih loh thu sawiin Dr R Lalthangliana chuan, "Mihring indaih lohna chingfel tur hian Mizoram pumah hmalak a ngai. Damdawi-in ṭha tak kan neih theihna atan theihtawp kan chhuah ang a, uluk takin kan ngaihtuah ang," a ti a, primary health centre, sub-centre, etc.-te pawh tihchangtlun a ngaih thu a sawi.

Health Minister chuan, health care scheme chungchanga hmalak an tum dan sawiin, "Mipuiin awlsam lehzuala an chhawr theih dan tur dap kan tum. Phaia thawnte kalna senso tum theih lohte hi ennawn a ngai. Sorkar hnathawk MR bill hrêk nasat lutukte hi an chanvo liau liau an chan theih loh phahna a ni. Dik lo taka bill siamte chungah erawh khauh taka action lak ni se," a ti.

Natna laka inven kawngah ṭan lak uar a ngaih thu sawiin R Lalthangliana chuan, "Damlo tihtlem theih dan tur leh damlo enkawl tur an tlem dan tur hi hmalakna hmasaa neih a ngai," a ti a; ṭha zawka damlo enkawl a nih theih dan tur pawh ngaih pawimawh a nih tur thu a sawi.

Health Minister hian district hrang hranga MJA member-te tan an awmna district hospital ṭheuha free clinic buatsaihsak an nih tur thu a puang a; ACH medical superintendent Dr KL Remsanga buatsaih 'Development of Eye Care Services in Mizoram' tih a tlangzarh bawk. 

Inkhawmah hian deputy medical superin­tendet Dr John Zohmingthanga'n free health check-up neih a nih dan a sawifiah a; MJA president Zonunsanga Khiangte-in 'The Progress and Present Status of Civil Hospital Aizawl' tih a tlangzarh bakah, RKS chairman Dr A Muthamma, Aizawl DC-in RKS sum hmanga lei emergency ambulance chahbi Health Minister hnenah a hlan a ni.