PMGSY hna atan cheng vbc. 311 a awm dawn

Mizoram sorkar chuan  Pradhan Mantri Gram Sadak Yojana (PMGSY) hnuaiah kawngpui sialna atan sorkar laipui aṭangin cheng vaibelchhe 311 a hmu dawn a; chu'ng zinga cheng vbc. 105 chu Central-in a la pe lo a, cheng vbc. 206 erawh chu kum 2018 opening balance-a mi a nia thu dawn a ni.

PWD hotute chuan, PMGSY hnuaia kawng laih hna chu kum 2022-ah zawh vek tura tih a nih laiin, central-a BJP kaihhruai sorkarin March 2019-ah zo vek turin a ti leh thut a, hun tiam March 2019-ah chuan zawh hman an beisei loh thu PWD hotute chuan an sawi.

PWD hotute sawi danin, PMGSY hnuaia hna thawhna atan hian March 2018 opening balance-a Mizoramin sum a neih zat chu cheng vbc. 206 a ni a, chuta 

ṭanga 60% tal hna thawh nan hman phawt a nih loh chuan central-in sum dang pek belh a tum tawh lo. 

Mizoram PWD chuan hna thawhna atan cheng vbc. 206 aṭangin vbc. 111.04 an pe chhuak tawh a, chuvang chuan central sorkar chuan kum 2018-19 atan cheng vbc. 50 a rawn dahsak a ni. PWD chuan central-ah cheng vbc. 55 dang a dil belh leh a, chu pawh chu central-in an phalsak avangin PMGSY hnuaia hna thawhna atan Mizoramin cheng vbc. 105 a nei leh dawn a ni. Sum erawh central-in a la pe chhuak lo thung.

PWD hotute chuan, central-ah sum an dil belh rang viau nia sawiin, "Ṭhálah lo hna kan thawk thei si lo a, bâkah MP inthlan­te a awm dawn avang­in pawisa hi an rawn release harsat phah kan hlau a, hei vang hian kan dil belh rang a ni," an ti. 

PMGSY hnuaia hna thawktu contractor-te uluk takin an vil ṭhin nia sawiin PWD hotute chuan, "Contractor hnathawh endiktu State Quality Monitor (SQM) an awm a, hei hi PWD-a thawk lai an ni lo," an ti a; SQM-ah chuan Mizo pahnih, PWD-a thawk ṭhin châwl tawh leh hnam dang pakhat an awm thu an sawi.

An sawi danin, SQM-te chuan contractor-te hnathawh chu a hmunah an endik ṭhin a, sawisel an neihte chu bialtu PWD eexecutive engineer-in hma a lak hnuah report an thehlut ve leh ṭhin. Central aṭangin National Quality Monitor an lo kal bawk a, anni chuan an endiknaa sawisel an neihte chu a bialtu PWD Division lamin hma an la leh nghal a ni.

PWD hotute chuan, PMGSY hnate chu online-a kalpui a ni vek tawh tih sawiin, langtlang takin kalpui a nih thu leh PMGSY website kaltlangin sum awm zat leh a hman dan hriat zung zung theih a nih thu an sawi a; contractor-in hna a thawh ṭhat loh vanga tihtawp ngaite chu dân awm sa anga an chawi tur zat leh kaihhruaina anga an kalpui zel thu sawiin, "Chawitir pawh kan nei nual tawh," an ti.

Tender chungchanga zawhna chhangin PWD hotute chuan, "Tender hi contractor ni lo tan pawh a chhàn theih a, mahse, experience an neih dan, hna an tawh tawh dan, sum leh pai dinhmunte chu tehfungah an paltlang a ngai thung," an ti a; register contractor a nih chuan tender chhannaah certificate thil tel a ngai tih an sawi.