Youth Parliament Festival neih a ni

National Service Secheme (NSS)-in India ram puma NSS volunteer-te intihsiakna atana a buatsaih, National Youth Parliament Festival 2019 chu Mizoramah pawh neih mek a ni a, nimin khan Aizawl district bik tan Pachhunga University College (PUC) Seminar Hall-ah neih a ni.

Aizawl District Youth Parliament Festival hawnna inkhawm hi nodal officer Dr Zoramdinthara Khiangte-in a kaihruai a, PUC principal Dr Tawn­enga'n a hawng. State NSS officer cum deputy secretary Dr Zirlianngura leh NYKS state director Sayed Ali te pawhin an hmanpui. Dr Zoramdinthara chuan, Youth Parliament Festival neih chhante sawiin, ṭha­laite'n ram tana an ngaih­tuahna an sen theih nana buatsaih a nih thu a sawi.

Festival hawngtu Dr Tawnenga chuan, PUC-ah Youth Parliament Festival nghah a ni chu lawmawm a tih thu sawiin, zirlaite chu an kal zelna turah duhsakna a hlan a, "Zirlaite hi inelna tak tak hmachhawn turin ka duh che u a, in hma lam hun atan taimakhna leh tumruhna nei rawh u," a ti.

Dr Tawnenga chuan, tunlai khawvel chu glo­bal village tih a nih angin, Mizoram pawh duh tawkin internet hmangin information chi tin hmuh theih a nih tawh avangin hmun kilkhâwr bik a ni tawh lo tih a sawi a, "Hniam bikah inngai lo ila, khawvel hi hma­chhawnin, ram danga ṭhalaite hi i el ve ang u," a ti a; Mizo zirlaite chu national level-ah pawh an tling thei an ni tih hre tur leh khawvel hmun dangte an en pha a ni tih hre turin a fuih.

District Youth Parlia­ment Festival-ah hian thupui pali - terrorism, economic offender, climate change leh Khelo India tihte zinga an duh ber hmangin zirlai NSS volunteer-te chu an intihsiak a; Aizawl district, Kolasib district, Mamit district leh Champhai district-a college/institution 12 aṭangin zirlai 39 an tel.

Intihsiaknaah hian a ti ṭha zual pangate chu - pakhatna Elijah LH Sanga (Hrangbana College), pahnihna Candle Vanrempuii (PUC), pathumna Lalnun­puia Renthlei (PUC), palina Laetitia Lalrin­ngheti (PUC) leh panga­na Lalhmingthanga (Cham­phai College)-te an ni. 

Aizawl District Youth Parliament Festival-a tih ṭha zual pathumte chu Lunglei district-a ti ṭha zual pathumte nen February 6, 2019 state level competition-ah an inel leh dawn a; state level-a a ti ṭha ber chu Mizoram aiawhin New Delhi-a national level competition-ah a tel dawn a ni.