Garbage truck 54 hman a nih hnuah Aizawl bawlhhlawh paih man a pung

Aizawl Municipal Corporation (AMC)-in SIPMIU, Aizawl aṭanga bawlhhlawh paih motor (garbage truck) 54 an dawn hnuah, contractor hmangin bawlh­hlawh an paih tâk avangin Aizawl khawpuia bawlhhlawh paihna atan senso a sang zawk a, kum khatah cheng nuai 59 chuang an sên belh.

Vanglaini-in RTI Act hmang­a a zawhna, AMC SPIO-in a chhan danin, December 2016 aṭanga November 2017 (kum khat chhung) thleng khan Aizawl khawpuia bawlhhlawh paihna atan AMC-in Rs. 4,16,85,640 (nuai 416.85) an sêng a, chu chu SIPMIU-in Asian Development Bank (ADB) aṭanga garbage truck 54 a lei hma a ni.

SIPMIU-in garbage truck 54 AMC hnena a pek hnu, December 2017 aṭanga November 2018 (kum khat) chhung khan Aizawl khawpuia bawlhhlawh paihna atan AMC chuan Rs. 4,76,27,094 an sêng thung a; a hma kum, SIPMIU aṭanga motor 54 a dawn hma aiin Rs. 59,41,454-in an sêng tam zawk a ni.

Tun dinhmunah Aizawl khawpui chhunga bawlhhlawhte chu PPP mode hmang leh contractor pakuate hmangin paih a ni a; contractor-te chu an motor hman a inzat loh avang leh an huam chin azirin rate hrang hrang an nei. Thla khata contractor atana sum senso tlângpui chu nuai 28.5 vel a nih thu AMC SPIO chuan a tarlang.

Vanglaini palai zawh belhna chhangin AMC hotute chuan, SIPMIU aṭanga AMC-in bawlh­hlawh paih motor 54 an dawn hma chuan PPP mode-in local council kutah a awm vek thu an sawi a, "A paih man hi AMC-in 80% kan tum a, LC-te'n 20% an tum thung," an ti. AMC-in truck 54 an dawn hnuah contractor pakua hman a ni a, contractor rawihna hun enchhinna hmasa atan thla ruk ruahman phawt niin, thla 15 chhung pawhsei tawh a ni.

Contractor pakuate hian Aizawl khawpui chhung an tuam kim a, motor lian kal theihna chin an huam. Motor tê chauh kal theihnaah chuan LC lam nen PPP mode hmanga kalpui a la ni thung. SIPMIU aṭanga bawlhhlawh paih motor 54 dawn hnu, kum khata sum senso nuai 59 vela a tam zawk chhan chu, bawlhhlawh paih dan phung tidanglam a, contractor rawih vang nia an hriat thu AMC hotute chuan an sawi.

Tarlan tawh angin, Mizoram sorkar (SIPMIU) chuan October 2, 2017-khan garbage truck an lei 54-te chu AMC kutah an hlan a ni.