Lo hâl hun hnuhnung - March 15

Environment, Forest & Climate Change minister TJ Lalnuntluanga hoin nimin khan a pisaah kumina 'Kângmei venna hapta' (Fire Prevention Week) hman dan tur ngaihtuahin Sub-Committee on Fire Prevention an ṭhu a; kumina lo hâl hun hnuhnung atan March 15 an ruat.

TJ Lalnuntluanga chuan, kângmei chu tute pawhin an tawrh theih a nih thu sawiin, "Kângmei pawizia leh a venna kawnga inhrilhriat kawngah mi tinin kan zawn ṭheuhah tih theih kan nei vek a, inhrilhriatna leh inzitirna (awareness) huam zau zawka kalpui a ṭul. Kum dang aia huam zau zawka inizrtir ka duh," a ti.

Sub-Committee-a member secretary Lalrinmawia, CCF chuan, Fire Prevention Week ṭobul leh kum danga an hman dan tlangpuite a tarlang a; awareness chu sum an neih dan azirin huam zau zawka tih an tum thu a sawi.

Meeting-a an rel danin, 'Kângmei venna hapta' hi February 11-16 chhunga hman tum a ni a, Chief Minister-in a hawng ang. Hapta pualin zirlai leh sorkar hnathawkte'n hapta pawimawhna an hriat theihna atan thu chham (pledge) siam a ni dawn a, chu chu zirna in leh pisa-ahte chham rual a ni ang.

Kângmei veng ṭha district leh khuate tana lawmman siam ṭhin chu chhunzawm a ni dawn a, a endik hna thawk turin tlawm­ngai pawl NGO hrang hrang ruat dan tur chu NGO-te leh department hoin an rêl ang.

Nimin vek khan Champhai District Fire Prevention Committee-te pawh an chairman, DC Dr. Naveen Aggarwal hoin a pisa-ah an ṭhukhawm a, an district chhunga Kangmei venna hapta hman dan tur an rel.

Dr Naveen Aggarwal chuan kangmei ven kawngah theihtawp chhuah a ṭul thu sawiin, district mipuite chu kangmei tichhuak lo tura fimkhur turin a chah a, "Mipuite hnenah a zau thei ang bera kangmei ven dan leh ṭul dangte hrilhhre tur chuan media chhawr ṭangkaia, mipui nawlpui thlengpha public awareness campaign neih a ngai a ni," a ti.

Meeting chuan DC hnen aṭangin VC tinte hnenah kangmei  ven kawnga tihtur leh zawm turte khauh taka hriattirna pek nise, dan pawisa lo chungah na taka hremna lek kawh ngei nise, an ti.

Kolasib District Level Fire Prevention Committee pawh nimin khan SDO (S) V Laldinsanga hoin Kangmei venna hapta hman dan tur ngaihtuahin DAO coneference hall-ah an ṭhukhawm.

Meeting chuan district administration lamin kangmei tichhuak lo tura khapna thupek chhuah nise, an ti a, dan bawhchhiate hremna tur leh a kaihhnawihte chu VC hrang hrang ah hriattir nise an tih bak ah, kangmei venna kawng a thawktha khuate hnenah lawmman siam sak leh nise an ti bawk.