KHAWTHLIR

Mizoram State Legal Services Authority chuan nimin khan TNT, Muanna Vengah 'Programme for Distribution of Disability Certifcate' an buatsaih a, Law & Judicial minister TJ Lalnuntluanga'n a hmanpui. Minister chuan, "Pa nei lote tana pa, nu nei lote tana nu, beng nei lote tana beng nih hi Pathianin a siam mihringte tih atana a duh ber a ni," a ti.

Nimin khan Siaha District Industries Centre Hall-ah BBBP hnuaiah Capacity Building for ANM & ASHA Cum RCH Performance Review, 2018-2019 buatsaih a ni. Chief medical officer Dr Lalparliani chuan, programme-in a tum ber chu Siaha district-a hmeichhe naupangte humhalh a ṭulzia leh an chanvo dik tak an hmuh theihna tura ṭanpui a tul a ni tih ANM (HW) leh ASHA-te a thara hriattir a nih thu a sawi.

Central YMA hnuaia SRS, Excise & Narcotics department leh Sector Assam Rifles-te ṭangkawp chuan Pathianni khan Chalzampuia s/o Vallawmliana, Sazep khua nia inchhál hnen aṭangin Edenthar Vengah heroin hawng 7 an man.

Aizawl Civil Hospital chuan kum 2018 chhung khan Poor Fund-ah cheng nuai 12.53 an dawng. Poor Fund-a 

ṭanpuina petu zawng zawngte hnenah an lawm thu ACH medical superintendent Dr KL Remsanga'n a sawi. Poor Fund hi a luh tam ber thla December-ah chuan Rs. 6,50,553 a lut a ni. 

Asom Gona Parishad (AGP) leh National People’s Party (NPP)-te huaihawtin vawiin hian Guwahati-ah hian India hmarchhak state-a chief minister zawng zawng leh tualṭo party hruaitute The Citizenship (Amendment) Bill, 2016 chungchang sawiho a ni dawn a; chief minister Zoramthanga pawh sàwm a nih avangin a tel dawn a, nimin khan Guwahati a pan.

GAD principal consultant (Civil Aviation) wing. commander J Lalhmingliana chuan nimin khan Secretariat-ah pisa a luah ṭan a, Mizorama thlawhtheihna service 

ṭha zawk a awm theihna tur leh Lengpui Airport tichangtlunna atana sorkar ruahmannate chak taka bawhzui a tum thu a sawi.