Sorkarin dry day a puan Court-in a sût MLPC thlakna tur kan buaipui mek - END Minister
Mizoram sorkarin December 21, 2018 aṭanga March 31, 2019 thlenga zu zawrh phal lohna ní, dry day an puan chu Gauhati High Court, Aizawl Bench-in a sût. Hetih lai hian, Excise & Narcotics minister (END) Dr K Beichhua chuan, MLPC Act thlakna tur an buaipui mek thu a sawi.
December 21, 2018 aṭanga March 31, 2019 thleng sorkarin dry day a puan avangin warehouse leh wine shop neitute chuan Mizoram sorkar chu High Court-ah an khing a; Court chuan sorkar aṭanga insawifiahna a dawn hnuah nimin khan thutlukna a siam a, sorkarin dry day a puan chu a sût a ni.
Thu dawn danin, dry day puan chhung rei vanga zu lak khawjm sa hralh zawh hman a nih dawn leh dawn loh chungchanga insawifiah tura tihna chu sorkar ukilte chuan Court thutluknaah an innghah thuin an chháng a; zu zuarte'n hloh an neih chu sorkarin a duh bik loh thu an sawi thung. Warehouse leh wineshop-te aiawh hian ukil pali - B Lalramenga, Lalfakawma, C Lalfakzuala Chenkual leh Joseph Renthlei-te an ding a ni.
High Court order ang chuan, Mizoram sorkarin dry day a lo puan tawh zinga Pathianni leh national holiday chu dry day a ni chhunzawm ang a, Chapchar Kut hman hun tur February 28 leh March 1 pawh an duh chuan sorkarin dry day-ah a puang leh thei dawn.
Zu zuarte chu an license dam hun chhung chu sorkarin zu lak luh leh zawrh a phalsak tur a ni, tih a ni. Sorkarin zu zawrh a phal dawn lo a nih chuan hun tam tak zu zuarte'n an lak khawm sa an tihral theihna hun an pe tur a ni bawk.
Tun dinhmunah warehouse pathumte'n VAT nena belhin cheng vbc. 14.15 man zu an nei mek a, warehouse leh wineshop-te licence chu March 31, 2019 thleng a nung.
Vanglaini palai zawhna chhangin Excise & Narcotics Minister chuan, zu zawrh tihtawp tum chu an dinna ngai reng a nih thu a sawi a, "Zu zawrh hi dan hmanga tihtawp a ngai a, chumi hma zu zawrh a nih lohna atan dry day puan a ni. Mizoram Liquor (Prohibition and Control) Act thlakna tur hi buaipui mek a ni a, session hmasa berah put luh kan tum," a ti.
Dr K Beichhua chuan, theih chu ni se tun aṭanga zawrh lo a, zawrh loh hlen an duh thu sawiin, "Court thutlukna chu hnial rual a ni si lo. Dan hnuaia awm vek kan ni a, zawrh loh duh mah ila, tih theih kan nei lo," a ti a; zu zawrh tihtawp an la tum reng thu a sawi a ni.