Minister hoin zir-na tihhmasawn dan tur sawiho

School Education department hotute chu nimin khan Secretariat Conference Hall-ah an ṭhu­khawm a, School Education minister Lalchhandama Ralte  leh secretary Esther Lalruatkimi ten an telpui a; Mizoram zirna tihhmasawnna tur thil chi hrang hrang an ngaihtuah.

Meeting-ah hian sikul nau­pangte'n ipte (bag) an ah ṭhin chungchanga kalphung (school bag policy) tur te, sikul kai hun, Samagra Shiksha Abhiyan leh Continuous and Comprehensive Evaluation (CCE) chungchangte sawiho a ni.

School bag chungchangah, naupangin an ah rih zawng tur bituk an pelh loh nan NCERT-in a rih zawng tur a bituk (prescribe) bak zirlai zirtir loh a ṭul thu te, pawl 1 leh pawl 2-ah home work inpek loh a ṭul thute sawi a ni a; naupang lian lam - high school leh higher secondary school-ahte pawh school bag rih loh dan tur kawng zawn a ṭul thute an sawi.

Sikul kai hun chungchangah, primary school aṭanga higher secondary school-te'n tuna sikul kai hun hman meka harsatna an neihte sawi a ni a; sikul naupangte tana sikul ṭan hun hman tlan theih tur remchang zawk sawiho a ni.

SSA leh RMSA-te society pakhat Samagra Shiksha Abhiyan (SSA)-ah kalpui tur a nih avangin, kalpui dan tur buaipui mek a nih dante sawi a ni a; tun dinhmunah Ministry of Human Resource Development aṭanga sum hmuh a tlem avangin nikuma PAB pawm tawhte pawh tihpuitlin theih a la nih loh thu an sawi lang. 

CCE chungchangah, zirtirtu indaih lohna vangin CCE kalpui a harsat thu an sawi a; khawpui leh thingtlangah khairual taka kalpui theih a nih loh dante sawi niin, thingtlang lamah a bikin primary school-ah zirtirtu awm sain ṭha taka kalpui tura harsatna an tawh dante an sawi.

Minister Lalchhandama Ralte chuan, zirna lama a taka thawktute nen sawihon hun remchang an nei thei chu lawmawm a tih thu a sawi a; an sawihona chi hrang hrang aṭangin sorkarin thutlukna siamin hma a la zui dawn thu a sawi a ni.

Meeting-ah hian School Education director K Laldingliana leh SCERT director Laldawngliani Chawngthu te bakah, department hotu dangte leh zirtirtu pawl hrang hrang aiawhte an tel.