The Citizenship(Amendment) Bill hi NE-te tan a hlauhawm - CM Zorama

Nimin khan Guwahati-ah NE Region's Political Parties Convention neih a ni a, The Citizenship (Amendment) Bill, 2016 (CAB) chungchanga hmalakho dan tur an ngaihtuah. He hunah hian chief minister Zo­ramthanga, MNF presi­dent pawh a tel a, CAB chu hmarchhak tan a hlauhawm thu a sawi.

Guwahati aṭanga Vanglaini thu dawn danin, Zoramthanga hian CAB chu pawm a nih chuan India hmarchhak state-te tan a pawiin a hlauhawm tak zet tih a sawi a, "Kan ṭan rual a, he Bill hi kan do tlân a ngai. Keini chu he Bill hi kan duh lo tak zet a, na takin kan do a ni," a ti.

Zoramthanga chuan, meeting-a tel party hrang hrangte'n CAB an duh lohzia hrilh tura Pre­sident leh Prime Minister hmuh a rawt a, chu chu meeting chuan a pawm. Prime Minister leh President chu a rang thei ang bera hmuh rawtin Zoramthanga chuan, "CAB duh lo ve tho, kan rilru anpui political party dangte pawh kan be pawp tur a ni," tiin a sawi.

Convention chuan resolution pass in, India ram puma CAB duh lohna lantirna thláwptu zawng zawngte hnenah lawmthu an tarlang a; India ram puma political party hrang hrangte CAB donaa ṭanrualpui tura sawm leh chumi atana Committee din an rêl a ni.

Meeting hi National Peoples Party (NPP) president leh Meghalaya chief minister Conrad Sangma-a'n a kaihruai a; Asom Gona Parishad (AGP) president Atul Bora, Nagaland chief minister hlui TR Zeliang, JDU (Bihar), IPFT (Tri­pura) leh regional party dang eng emaw zat hruai­tute an tel. Mizoram CM Zoramthanga hi a adviser C Lalramzauva’n a ṭawiawm a ni.