Hmasawnna tluantling nei tur chuan Thingtlang aṭanga ṭan a ngai - Dr Thangtea

Planning & Programme Implementation department chuan nimin khan Assembly Annexe conference hall-ah ‘Sensitization workshop on District Level 

Planning’ an buatsaih a; khuallian Dr R Lalthangliana, minister chuan, hmasawnna tluantling nei turin thingtlang aṭanga ṭan a ngaih thu a sawi.

Dr R Lalthangliana chuan, hmasawnna tluantling leh ngêlnghet nei turin thingtlang aṭanga bul ṭan a ngai tih hriain sorkarin a zau thei ang ber huam tur SEDP uluk taka a duan thu a sawi a, "SEDP hi Planning department leh sorkar department dang zawng zawngte pawhin ngaih pawimawh berah an neih zel a pawimawh dawn a, chuvangin Planning department lamin zir chiang se ka duh," a ti.

Thingtlanga hna thawhnaah khua leh khawtlang mamawh tak tak thilte ngaihtuah hmasak a ngaih thu sawiin R Lalthangliana chuan, "Anmahni inenkawl theihna tur kawng dapsak a ngai a, hei hian thuneihna sem zâi thiam (power decentralisation) a keng tel dawn," a ti a; thuneihna sem zai chuan rah ṭha tak a nei theihna turin a mawhphurtu tak tak turte chu khaw mipui leh khawtlang hruaitute an nih dawn thu a sawi.

Workshop-ah hian Assembly speaker Lalrinliana Sailo pawhin thu sawiin, Mizoram hmasawnna tur (planning) khawihtute'n district aṭanga bul ṭan a fuh ber tih rilruah nei se a duh thu a sawi a, "Tun sorkar hian SEDP hmangin ram siam hna thawh tak tak an tum tih a hriat a. Tun dinhmunah eng kawngah pawh sorkar a inrawlh loh chuan hmasawnna a awm thei tak tak lo a, eng level-ah pawh power decentralisation sem thiam a, sorkar hnathawkte'n an mawhphurhna an kengkawh thiam a ngai dawn a ni," a ti.

Planning secretary Dr C Vanlalramsanga chuan, UNO hnuaia ram zawng zawngte chu sustainable development goals point 17 pek vek an nih thu sawiin, "India ramah chuan Niti Ayog-in a kalpui laiin, Mizoramah chuan Planning leh a line department-ten an kengkawh thung. Khawvel pumin a ruala hmasawn a, tumah inkalsan bik awm loa hmasawnna tluantling tana thawhhona dah pawimawh ber," a ti a; hmasawnna tur ruahmanna mumal zawk awm theih nan official statistics leh data base rintlak leh kimchang a awm a ngaih thu a sawi.

Workshop-ah hian District Planning Committee-in District Planning Process atana hmalak nana a hman ṭangkai tur inzirtirna hun hman a ni a; line department zawng zawnga hotu lu ber te, DPC-Aizawl member te, local council leh village council hruaitute an tel a ni.