Rinawm taka thawkte mi ropui an ni - Dr K Beichhua

Mizoram ICDS Child Development Project Officer Association (MCDPOA) chuan nimin khan White Stone conference hall, Ramhlun Venglaiah inkhawmpui an hmang a; khuallian Dr K Beichhua, Social Welfare minister chuan, khawvela mi ropui berte chu mahni hnaa tui leh rinawm taka thawkte an nih thu a sawi.

Dr K Beichhua chuan, Social Welfare department, a bik takin CDPO-te'n mawhphurhna sang tak an neih thu sawiin, "CDPO-te'n in pawimawhna in hriat chian a pawimawh. CDPO-te chuan nausen aṭanga kum upa tak tak thleng hamṭhatna an ngai pawimawh ṭhin a, mi dang tana inpekna hi hna ropui tak a ni," a ti.

Social Welfare Minister chuan fuihna thu sawiin, "Kan enkawlte hi ngaihtuah chiang ila, nu pum chhunga awm naute leh pianphunga rualbanlo thlengin kan buaipui a, dâwngdah taka thawh mai mai theih a ni lo. Khawvela mi ropui berte chu mahni hna tui leh rinawm taka thawkte hi an ni," a ti a; inkhawmpui chuan rah ṭha tak a neih ngei theih nan duhsakna a hlan.

Mizoramah Integrated Child Development Services (ICDS) hnuaiah project 27 a awm mek a, chu'ng project-te chu CDPO-te'n an enkawl a ni.