Serchhip district website tlangzarh

Serchhip district-a sorkar official website - https://serchhip.nic.in chu nimin khan district bawrhsap Sangchhin Chinzah-in a pisaah a tlangzarh. Bawrhsap chuan, an district bik tana website rintlak tak siam a ni chu hmasawnna rahbi pawimawh tak a nih thu a sawi.

Serchhip DC chuan, an district website chu buatsaih a nihna ang taka ṭangkai taka hman a nih ngei a beisei thu a sawi a; Website chu a bul ṭanna chauh a nih thu leh  hmabak tam tak a la awm thu te, website ṭha leh changtlung a nih zelna turin Serchhipa sorkar department hrang hrang, NGO-te leh mipui thawhho ṭhat a pawimawh thu a sawi bawk.

Serchhipa district informatics officer Lalruatmawia Zadeng chuan, website chu August 28, 2018-a peihfel tawh ni mah se, inthlan dawn avangin an tlangzarh mai thei lo tih a sawi a; website chu National Informatics Centre (NIC)-te'n S3WaaS project hnuaiah GIGW (Guidelines for Indian Government Websites) mil thlapa standard sang tak neia an buatsaih thu te, 'Bilingual website' - English leh Mizo ṭawng inkawpa engkim buatsaih a nih thute a sawi a ni.

Website thar hi hmanraw hrang hrang - computer, tablet, mobile phone-te hmanga awlsam taka hman a nih theihna atan 'responsive website' tih vek a ni a; mitdelte pawhin an hman theih nan 'screen reader' support a nih bakah, mit fiah lote tan pawh hawrawp (font) leh screen color-contrast adjust theih tura duan a ni bawk.