Kawng siamna tur balu lak sa Hnâwl turin MLA-in a hriattir

Aizawl South-III bialtu MLA Prof. F Lalnunmawia chuan January 28, Thawhṭanni khan a bial chhunga Lamchhip leh Chawilung khuate tlawhin, Hmuifang aṭanga Chawilung leh Lamchhip panna kawng siam mek a enfiah a; kawng siamna atana contractor-in balu an chhêk khâwl sa chu a ṭhat tâwk loh avanga hnâwl turin PWD hotute a hrilh.

Prof. F Lalnunmawia chuan, Hmuifang leh Lamchhip inkar kawng siamnaa hman tur contractor-in balu a dah khawm tawhte chu a ṭha tâwk lo tih sawiin, a rang thei ang bera paih a, balu ṭha zawk ngaihtuah nghal turin PWD hotute leh contractor a hrilh a ni. Hmuifang-Chawilung kawng hun rei tak chhe tawh chu a chak thei ang bera siam a, kumin fûr hma ngeia kawng chhe zualpui siam zo turin a ti bawk.

Chawilung khawtlangin an lo hmuahnaah thu sawiin F Lalnunmawia chuan, MNF sorkar hnuaiah chuan hmasawnna hnathawhte'n mi mit tlung se, ṭha se, belhchian dâwl bawk se an duh thu a sawi a, "Hlêp tur ringawt hisâp loin, a ṭha thei ang bera thawh tur a ni a, a finishing a ṭha bawk tur a ni," a ti.

Prof. F Lalnunmawia chuan, inthlan campaign laia a sawi ṭhin angin, Lamchhip leh Chawilung khuate'n kawng ṭha an neih theih nan chak zawka hma a lak dawn thu a sawi a, "Khawtlang hruaitu leh mipuite'n contractor hnathawh lo enpui ula, ṭha lo lai a awm chuan in siamṭhattir zung zung a ṭul dawn a ni," tiin, kawngpui 

ṭha an neih theih nan mipuiin tih tur an neih ve thu a sawi.