KHAWTHLIR

Vawiin January 30 hian ram pumah India zalenna suala nun chán ta hnam pasalṭhate hriatrengna ní, Martyrs' Day a ni dawn a, he ni pual hian hun hman a ni dawn. Vawiin chhun dar 11-ah bawrhsap pisa aṭangin siren tihrîk a ni ang a, siren a rik veleh minute hnih chhung ngawi renga din tur a ni. Minute hnih chhung ngawi renga din hi zawm vek turin mi tin ngen an ni a, ke-a kalte bakah, motor tlân laite pawh sing tura beisei an ni.

Ngaizel Taxi Welfare chuan nimin khan MIMER/State Referral Hospital Blood Bank-ah blood donation camp an huaihawt a, mipa 30 leh hmeichhia pakhatin thisen unit 31 an pe.

MJA member mi 10 leh IPRO pahnih, Nagaland-a Press Tour neia zin turte chu nimin khan IPR minister Lalruatkima'n IPR Directorate kawt aṭangin a vai liam. Lalruatkima chuan, Press Tour-a kalte chu mipui hnena puan chhuah tur leh mipui zirtirna kawnga hriatna thar hawn tum turin a chah.

NGO Coordination Committee chuan thuchhuah siamin, The Citizenship (Amendment) Bill, 2016 dodalna atana kumina Republic Day Mizoram puma boycott a nih chungchangah, mipui leh zirlaite NGO-te ngenna anga Republic Day lawmnaa an tel lo chu lawmawm an tih thu an tarlang a, "A hlawhtlin theih nana hun leh tha sênga thawkchhuak zawng zawngte chungah lawmthu kan sawi a, hwe hmalakna hian rah ṭha a chhuah ngei kan beisei," an ti.

Central YMA hnuaia SRS leh Excise & Narcotics department enforcement-te chuan January 27, Pathianni khan Methamphetamine mûm 2,424 an man a, a neitua puh Thangmawizuala s/o Rumliana, Vaphai Saron Veng nia inchhal an man nghal bawk. Meth mûm 2,424 hi tualchhunga hralhna ang chuan Rs. 3,63,600 vel man a ni a, a neitu nen Champhaia Excise & Narcotics-in an la nghal a ni.

Aizawl South-II bialtu MLA Lalchhuanthanga chuan nimin zing khan a bial chhunga ITI Veng a tlawh a; ITI Veng Local Council hruaitute nen an veng chhunga hna thawh mek leh hmabak te, hmalak zui ngaite chu an sawiho bakah an enfiah.