Khawizu leh hnute tui luanna ramah Mizoram siam kan tum - CM
Nimin chhun khan Aijal Club-ah Horticulture department Officers Meeting neih a ni a; he hun hmanpuitu chief minister Zoramthanga, Horticulture minister ni bawk chuan, Mizoram chu khawizu leh hnute tui luanna ramah siam an tum thu a sawi.
Chief Minister chuan, Mizoram hmasawnna tura ruahmanna an siamah Horticulture lamin hmun pawimawh tak a chan thu sawiin, "Development department tam zawk chang tura min duhte an awm. Mahse, work department-ah chuan PWD chiah ka chang a, a bakte chu CM nihna anga chan turte a ni hlawm. Mizoram hmasawnna tura kan vision-ah Horticulture-in hmun pawimawh a chan avangin ka la chat a ni," a ti.
Mizoram vanneihzia sawiin Zoramthanga chuan, "Thlai engkim ṭhat duhna hmun a ni a, sik leh sá nuam tak kan nei a, ram rálmuang berte zinga mi kan ni. Ruahtui tlâk dante hi tun aia tam nge, tlem nge tla se duh tih vote la ila, ngaihdan a inang lo hlawm khawp ang. Pathian hnenah dil belh tur kan nei tawh chuang lo a, kan kutah a innghat ve tawh a ni," a ti a; ram hausa tak kan neih avangin chona nasa tak a awm thu a sawi.
Zoramthanga chuan, leileta siam theih ram hectare 70,000 vel Mizoramah a awm thu sawiin, "Hengte hi kháwl hmangin leiletah han siam ila, Zoram ei sên loh a thar theih. Buh seng hnuah thlasik thlai kan chíng ang a, buh aia tam daih a thar theih a ni. Kan ram ruak neihte hi chhung tinin ṭín 30-40 velin kan insem thei vek ang. Chhungkaw 3,000 hian leilet nei se, khawl nen an buaipui chuan Mizoram min châwm thei ang," a ti.
Department hotute ráwn loin eptu an nih laiin hmasawnna hnathawh dan tur an duan vek tawh thu sawiin CM Zorama chuan, "Hna ṭan nghal vat tur a ni. Kan ngaihtuahna thlak ila, ṭâmna ram hi malsawmna ram a ni thei. Mizoram hi khawizu leh hnute tui luanna rama siam kan tum a ni," a ti a; chutiang tur chuan hma an la dawn tih a sawi.
Chief Minister chuan, Mizoram chu chaw, thlai leh saah a intodelh tur a nih thu sawiin, "Thawn chhuah tham kan neih theih chuan a lawmawm a, a hmasain intodelh phawt kan tum ang. Thlaiah pawh a sîng bî lak luhna lek tur chu tih loh tur, a nuai bi lâk luhna tur, Mizoram châwm a, kan intodelhna tur ngaihtuah tur a ni. Ka vision fiamthu thawhna atana hmang an awm ṭhin a, a lo hlawhtling leh ṭhin," a ti.
Zoramthanga chuan, tuna Mizorama maute chu a tê lutuk nia sawiin, "Kan raw chìn tur chungchang hi Union Agriculture Minister pawh ka sawipui tawh a, a bangbo khawp mai. Raw hmun, raw pakhat pawh patling pahnih pathum pû kan phun dawn. A bul ṭantu kan ni dawn a, entawn tur pawh kan la hmu zo lo," a ti a; raw lian chi chu chi hnih phun a nih tur thu a sawi.
Raw chîn tur chu a tám aṭanga lak ngai chi a nia sawiin Chief Minister chuan, "Kum 50 danah a tàm avangin a buaithlak khawp mai. Chuvangin, tissue culture-a tih a ngai a, hmân aṭang tawhin hetiang ti tur hi ka zawng a, ka hmu chhuak tawh. Kan chìn hunah chuan ram hectare hnih lekah pawh miin cheng nuai tél an la lut thei dawn a ni," a ti.
CM Zoramthanga chuan, raw chíng tamna khuaah chuan industry emaw, semi processing tih theihna tur bun a ngaih tur thu sawiin, "Sâwngbâwl theih leh hralhna a ṭha a ni mai," a ti a, Horticulture department hotute chu raw puitlin hmaa thlai chîn tur hlâwk leh hralhna ṭha ngaihtuah turin a chah.
Inkhawmah hian Horticulture secretary Rodney L Ralte leh director Dr Elizabeth Saipari te pawhin thu an sawi a; joint director Vanlalruata Chenkual-in an department hmalak tawhna leh hmachhawp hrang hrangte Chief Minister a hrilhfiah a ni.