Ram pumah Martarte Ní hman a ni
Nimin kha India tana zalenna sualnaa nunna hlantu Martarte Ní a ni a, India ram hmun hrang hrangah hman a nih bakah, Mizoramah pawh hman a ni.
He ni pual hian Governor Kummanam Rajasekharan chuan nimin zing khan Kolkata Mizoram House kawtah India ram tana martarte zahna lantirin pangpar a dah.
Martarte Ni hi India hnampa, Mahatma Gandhi thih champha, January 30-ah India ram pumah hman ṭhin a ni a; Martyr's Day puala Kolkata Mizoram House kawta inkhawmna buatsaihah Governor chuan, Mizoram mipui zawng zawngte chu India Hnampa duh dan leh suangtuahna anga ram kalsiam siam tur leh hma la chhunzawm zel turin a chah.
Martarte Ni puala inkhawm tawiah hian Kolkata Mizoram House additional resident commissioner Lalsangliana leh a thawhpui bakah, Mizoram House-a mikhual thlengte an tel a ni.
Aizawl khawpuiah chuan Martyr's Day-ah hian nimin chawhma dar 11 khan Bawrhsap Pisapui aṭangin siren tihrik a ni a, siren a rîk aṭanga minute hnih chhung lirthei che vêl tihdin a nih bakah, sorkar hnathawkte pawhin minute hnih chhung ngáwi rengin an hna thawh lai an chawlhsan a ni.