YMA leh PWD-in kawng siam an enfiah

January 29, Thawh­lehni khan YMA sub-headquarters, Lunglei hruai­tute leh PWD hotu­te'n Aizawl-Lunglei World Bank Road-a PWD Lunglei Division huam chhunga kawng chhe lai siam mekte a hmunah an enfiah.

Hei hi Mizoram PWD leh Central YMA-ten Memorandum of Understanding (MoU) an siam bawhzuina a ni.

PWD hotute chuan, Aizawl-Lunglei kawng siam mek chu kumin March thla chhung ngeia zawh hman an beisei thu an sawi a; Lunglei YMA hruaitute chuan, kawng siam hna thawh thawh chin chun lungawithlak thawkhata an ngaih thu an sawi rualin, hna thawktute chu ṭang leh zual tur leh fûr ruahtui tlâk hmaa siam zo turin an ngen.

Lunglei YMA hruai­tute'n kawng chhe lai siam mai bakah, kawngpui sira tuihawk luankawr (side drain) ṭha tâwk lo laite chu siamṭhat ṭha an tih thu an sawi chungchangah PWD hotute chuan hmalak nghal an tum thu an sawi. Kawng siamtute pawhin kawng chhak lei min paih chungchanga an harsatna tawhte an sawi lang a; YMA hruaitute'n hmalakpuiin, kawng chhak leiminte chu paih fai nghal tum a ni.

YMA Sub-Hqrs. hruai­tute chuan, kawng siamnaa PWD hnathawk­tute an inpekna ṭha an tih rualin, mipui rawngbawlna a nih hre chunga ṭhahnemngai taka hna thawk zel turin an ngen a; hna thawktute'n an mamawhna leh puih an ngaihnaah Lunglei YMA-in puih an inhuam reng thu an sawi.

YMA Sub-Head­quarters, Lunglei thu­chhuah chuan, Aizawl-Lunglei via Thenzawl kawngin hma a sawn zel theih nan an huam chhunga YMA branch hrang hrangte chu PWD nen theihtawp chhuaha thawhho zel an tum thu a tarlang.