Hri danna pek tur sawiho
Aizawl East leh Aizawl West-a District Task Force on Immunization chu nimin khan Aizawl DC Dr A Muthamma hoin DC conference hall-ah an ṭhukhawm a; March 2019-a zenghri danna pek beihpui thlâk (pulse polio vaccination) atana inbuatsaihnate an sawiho.
Kum 2018 khan Mizoram pumah zeng hri danna naupang pek tura ruahman zinga 99% hnenah pek a ni a, nikum aia ṭhaa zenghri danna hi pek a nih theih nan leh 100% a tlin theih nan meeting-ah hian rawtnate leh harsatna awm ṭhinte sawiho a ni.
Meeting-a tarlan danin, a bik takin Aizawl East huam chhung Manipur ria khaw awmte zingah kal pawh harsa deuh a awm avang leh Aizawl khawpui chhunga awm nghet lo, lut leh chhuak an tam avangin hri danna pek kim a harsa a ni. Heng hmun te hi chhinchhiah (map out)-a, vaccine pek kim an nih ngei theih nan thlur bing dan ngaihtuah tum a ni.
India ram hi zenghri ûm bona ramah kum 2014 khan puan a ni tawh a, chutih rualin, ram ṭhenawm Afghanistan leh Pakistan ramahte zenghri vei an la awm avangin zenghri danna hi uluk takin India ram chhungah pek zui zel a la ngai a ni.