Ran hriléng ven dan tur zirho a ni
AH&Vety department chuan nimin khan Siaha DC Conference Hall-ah 'Awareness campaign on Animal Disease Surveillance' an buatsaih a, district bawrhsap mawhphurhna la mektu H Zonunmawia, election officer-in a hawng. Aizawl aṭangin Dr Lalnunhlima Ralte, Dr F Lalṭanpuia leh Dr Esther Lalzoliani ten thil pawimawhte an zirtir a ni.
Animal Disease Surveillance awareness campaign-in a tum ber chu, Mizorama ran hri léng dinhmun zir chian leh hri léng darh zel loh nana hmalak te, ran hri lêng mai thei laka inven dan tur zirho te, ran hri a lên lohna tura ram dang leh hmun dang aṭanga ran lak luh a nih lohna tura hmalakte a ni.
Mizoram chu kum 2023 ral hmaa ran hrilêng awm lohna (animal disease free) state-a siam leh Mizoram chu bawnghnute, artui leh saa intodelhtir tum a ni a; state leh ram páwn thlenga thawn chhuak theih tura khawpa ran vulh lama ṭan lakte a tel bawk.
Mipui hnena zirtirna an pek dan
1. Ram dang aṭangin ran vulh tur lak luh loh tur.
2. Ran hrisel ṭha tih hriat chian chauh lei tur a ni.
3. Ran lei thar reng reng ran vulh laite nen dah fin nghal mai lo a, ni 30 tal dah hran phawt tur.
4. Ran-in chu mi dang tlawhtir loh tur, mi dang ran-in pawh tlawh mai mai loh tur.
5. A hun takah hri venna vaccine pek ṭhin.
6. Ran-in leh a velte, ranvulhna hmanrua leh bungruate damdawi hmanga silfai ṭhin tur.
7. Ran a dam loh emaw, a thihin emaw, AH&Vety department-ah hriattir vat.
8. Ran damlo hralh chhuah loh tur.
9. Ran thisáwn sa hralh loh tur a ni.
10. Ran thi chu thûk taka phûm ṭhin tur.