KHAWTHLIR

Nimin khan Lawngtlai DC conference hall-ah electoral roll observer Sangdingliana hoin electoral roll revision neih mek chu rintlak, dik leh felfai taka kalpui a nih theih dan tur sawiho a ni. Sangdingliana chuan, electoral roll buaipui chu hna hautak, inthlahdah theih loh, fimkhur taka thawh ngai a nih thu sawiin, a buaipuitute chu inpekna tak tak nena thawk turin a chah.

ICFAI University, Mizoram leh Indian Institute of Technology-Bombay chuan, nimin khan ICFAI University campus-ah online hmanga software zirna ‘Spoken Tutorial’ an buatsaih a, ICFAI University vice chancellor Lt.Gen. Dr AK Misra-a'n a hmanpui. Lt.Gen. Dr AK Misra chuan, tunlaiah chuan mihringte information technology tel loa an awm theih tawh loh thu sawiin, online hmanga computer software zirna, ICFAI-a hawn chu changtlung zawka kalpui zel a nih tur thu a sawi.

Mizoram sorkar chuan thuchhuah siamin, electoral roll revision neih meka hriat chian duh nei, Aizawl district mipuite tan electoral roll observer Biaktluanga hnenah telephone number 0389 - 2322197-ah office hun chhungin zawhfiah theih a nih thu an tarlang.

Mizoram sorkar chuan thuchhuah siamin, RUSA hnuaia sak zawh tawh, Mizoram Engineering College, Lunglei Pukpuia mi chu February 3 tlai dar 3:45 khian prime minister Narendra Modi-a'n a hawng dawn tih an tarlang. College hi India rama RUSA hnuaia project dang zawh tawh 150 nen a rualin New Delhi aṭanga hawn tur a ni a; Higher & Technical Education minister Dr R Lalthangliana hoin official-te'n Secretariat conference hall-ah an lo hmanpui dawn a ni. 

Pang Zirlai Pawl chuan, nimin khan Vaṭhuampuiah 'Climate Change & Related Issue' tih thupui hmangin awareness campaign an buatsaih a, Lai Autonomous District Council (LADC) sorkara district council conservator of forest (DCCF) K Lalromawia'n a hmanpui. Campaign-ah hian khawthlang nu leh pa leh zirlai naupangte an tel a; K Lalromawia chuan, thing leh maute chu an mamawh viau a nih loh chuan kit mai mai lo turin kal khawmte a chah.