MTOA leh MTDA member ni lo Buhfai phurh phalsak an ni

FCSCA minister K Lalrinliana hoin nimin khan mipui ni tin mamawh, a bikin buhfai Mizoram hmun hrang hranga phurh thlen zung zung a nih theih dan tur sawiho a ni.

Mizoram Truck Owners’ Association (MTOA) leh Mizoram Truck Drivers' Association (MTDA) member ni lote pawh buhfai phurh phalsak rih an rel bakah, tipper neitute pawh buhfai phur tura ngen an rél.

Meeting-ah hian, Bairabi rel chawlhhmuna buhfai rel wagon 21 awm mek leh wagon 29 lo thleng thar unload turah a phur tur truck a tam thei ang berin an dawh theih tura hawn ni se, an ti a;  FCI-in chhawr tur mi leh sa an nei tlem a, buhfai hlān thlak laia buhfai bothlau tur venga vil tur security force dah turin Mizoram sorkar ngen an rel.

PMGKAY hnuaia AAY leh PHH-te tan thla thum chhung mi pakhat hnenah buhfai kg. 5 a thlawna sem turah FCI leh Supply department inbuatsaihna a ṭhat avangin harsatna a awm lo tura ngaih a nih thu an sawi.