Zophaia police awmna tur sak tumtu Bairabi ṭhalaite police-in an dang
MZP, Bairabi Sub-Head-quarters, bultumin nimin khan Bairabi ṭhalaite'n Zophaia tun hnaia buaina thlenna hmun bul hnaiah Mizoram police-te awmna tur sak an tum a, mahse, Mizoram police-te'n remti loin an lo dang.
Bairabi MZP hruaitute hnen aṭanga Vanglaini thu dawn danin, Zophaia buaina chhuahna hmun aṭanga km. chanve velah Ramri lui a awm a, chu chu Mizoram leh Assam inrìna a ni a; buaina chhuahna hmun bul lawkah Assam police-te an awm bakah, Assam mi leh sate an kal reng thei a ni. Hetih lai hian, Mizote chu buaina thlenna hmuna an kal Mizoram police-in an phalsak lo thung.
Assam mi leh sate an duh duha buaina chhuahna hmuna an kal thei bik chu an lungawi loh thu sawiin Bairabi MZP hruaitute chuan, "A ram neitu ni lo zawkte duh duha an kal theih laia ram neitu zawk kal min phalsak lo hi kan hrethiam lo," an ti.
Bairabi MZP hruaitute chuan, Assam police-te chu buaina chhuahna bul velah an awm reng tih sawiin, "Assam mi leh sate duh duha an che vêl thei bik hi kan duh lo a, chumi veng tur chuan Bairabi ṭhalaite'n kan police-te awmna tur sak kan tum a ni. Hetia min lo dang hi hriatthiam har kan ti hle," an ti a; dan an nih reng chuan Mizo leh Mizo innawr buai hun a thlen an hlauhthawn thu an sawi.
Bairabi ṭhalaite'n Mizoram police awmna tur sak an tumna hmun hi buaina chhuahna hmun bul, buaina a chhuah avanga police-te awmtirna hmun a ni. Mizoram police-te awmna piahah Assam police-te an awm ve. Zophaia IR camp chu tuna buaina chhuahna hmun aṭanga km. 1 chuang a ni.
Vanglaini palai zawhna chhangin MZP Gen.Hqrs. president B Vanlaltána chuan, tuna Zophaia Mizoram police awmte chu pawh kìr an nih an hlauh thu a sawi a, "Mizo mipui thlamuan turin police-te hi awm reng se kan duh. Chuvangin, he lai hmunah hian MZP chuan in sak kan tum a, kar leh lamah chuan sak ṭan theih kan inbeisei," a ti.
February 9, 2021 tlaia Zophaia buaina a chhuah hnuah MZP hruaitute chu an President hoin Zophai panin an kal nghal a ni.
Central YMA aṭanga Zophai hmuna kal vice president Lalhmachhuana chuan, CYMA ang chuan buaina thlen chung-changah hian ngaihdan an la siam lo tih a sawi a, "Report kan thehlut ang a, committee-in a la ngaihtuah ang," a ti.
Lalhmachhuana chuan, Zophaia an awm laiin Assam official-te thil thlen dan zir chian tuma an rawn kal thu sawiin, "Kan ram chhung a nih avangin anni'n an lo zir chian ṭul kan ti lo a, kan kìrtir a ni," a ti a; Assam mi leh sate pawh an bungruate la a, in sa tawh lo tura an hriattir thu a sawi.
Assam sorkar official-te'n buaina thlenna hmun leh a chhehvel chu an ram chin anga an ngaih thu sawiin CYMA Vice President chuan, "Mizoin LSC kan neih thlap thu kan sawi pawhin, an hriatpui loh thuin min chháng. Ka mimal ngaihdanah chuan, he lai hmuna ram neitute hian hnam dang an chhawr a nih pawhin, an ta neih lohna atan enkawl thiam se awmzia a nei deuhin ka ring," a ti.
Hetihlai hian nimina Bairabi Joint YMA hmalakna-a Zophaia ramri buai chungchang hmalak dan tur ngaihtuaha ṭhukhawm chuan vawiin, February 12 hma-a Ramri Lui bulah temporary-a IR duty na tur sorkarin a siam loh chuan, February 13 ah Bairabi ṭhalai rualin IR duty post siam hnatlang nei se, an ti.