KHAWTHLIR

National Service Scheme (NSS) Mizoram State Cell ruahmannain nimin khan NSS volunteer-te'n Aizawl Civil Hospital blood bank-ah thisen unit 29 an pe a, mipa 23 leh hmeichhia paruk an ni. Thisen petute hi St. Xavier's College aṭangin mi 23 leh Pachhunga University College aṭangin mi paruk an ni.

Mamit bawrhsap Dr Lalrozama chuan nimin khan Mamit District Hospital medical superintendent Dr T Lalrintluanga hnenah nu nau nei leh nausênin an hman tur hmanraw hrang hrang a hlân. Hmanruate hi North Eastern Council aṭanga Tranformation of Aspirational District hnuaia cheng nuai 100 an dawn aṭanga lei a ni a, hmanraw hlan tâkte lei nan Rs. 5,56,690 sèn a ni.

Champhai DVO Dr B Zonghinga chuan nimin khan Vangtlang khuaa sial vulhtute a tlawh a, an hmalakna a enfiah. DVO hian  Fostering Climate Resilient Mithun Shelter-Community Level and Water Supply Facility for Grazing Area’ hnuaia se in sak, a vengtute chawlhbuk leh tuipekna  siamte hman theih turin a hawng nghal.

Nimin tlai dar 5 dinhmun angin, State Referral Hospital-ah Covid-19 vei mi pathum enkawl mek an ni a, pahnih chu ICU-ah awmin, Isolation ward-ah pakhat a awm. SRH-ZMC Bulletin tarlan danin, ICU-a awmte chu ventilator hmanga enkawl ve ve an ni a, ward-a awmin harsatna lian tham a nei lo. AMC laboratory-ah nimin khan February 10&11-a lak swab sample 137 endik a ni.

Mizoram College of Nursing (MCON) chu nimin khan National Assessment And Accreditation Council (NAAC) Peer Team-in an enfiah. NAAC team hi Health secretary H Lalengmawia, principal director Dr F Lallianhlira leh MCON principal Lalchhanhimi ten an lo dawngsawng a; H Lalengmawia chuan, MCON-ah B.Sc. (Nursing) batch khatah mi 30 zel lak a nih thu leh mi 349-in an zir chhuah tawh thu a sawi.