SEDP hmangin mimal tin khai chhuahna tur Ruahman thuai kan inbeisei - Dr Thangtea

MNF adviser Dr R Lalthangliana chuan nimin khan Chhinga Vengah AMC inthlan atan campaign-in hun a hmang a; Socio Economic Development Programme (SEDP) hmangin mimal leh chhungkaw tin inkhai chhuah theihna tur ruahman thuai an inbeisei tih a sawi.

Dr R Lalthangliana chuan, MNF kaihhruai sorkar chu Covid-19 avangin kum khat chauh la sorkar ang an nih thu sawiin, "Sorkarah duhthusam ang la hmu lo inti tan pawh vuina hun a la awm lo. Covid-19 hi a reh ang a, SEDP hmangin mimal leh chhungkaw tin inkhai chhuah theihna tur ruahman thuai kan inbeisei a ni," a ti.

MNF kaihhruai AMC sorkar thar piang turah nasa takin hmasawnna an hnûk lût dawn nia sawiin R Lalthangliana chuan, Aizawl Civil Hospital hi nasa taka tihchangtlun kan tum a, tlâk lam pang, awihpang ram âwl rimchhe ṭhin lutuk kha kan siamṭha tawh," a ti a; Civil Hospital ram ruakah in zângkhai, doctor leh nurse-te chênna tur sak an tum thu a sawi.

Dr R Lalthangliana chuan ZPM leader Lalduhoma chungchang sawiin, MLA aṭanga bàn a ni chu a khawngaih bertute zingami nia a inhriat thu a sawi a, "Mahse, dan a bawhchhiat avangin kan MLA-te'n thu dik hâi lang turin lehkha an thehlut a ni mai a, Speaker pawhin hreh tak chungin a tih tur tak a ti a ni," a ti.