Ramrî-ah electric ban phun tum a ni

Power & Electricity minister R Lalzirliana chuan nimin zing khan Zophai bula Mizoram leh Assam inrìna, Ramri lui a tlawh a; Mizoram sorkarin ramri chei ṭhat a ngaih pawimawh thu leh ramrî-ah electric ban phun tlar tum a nih thu a sawi.

Sorkar thuchhuah tarlan danin, minister R Lalzirliana hian Zophaia Mizo IR duty post a tlawh a, IR police-te chu chu huaisen taka awm tura chahin, "Min thlahtute ram lo sual chhuah sa venhim hi a ram neitu mawhphurna a nih rualin, hemi kawnga pawimawh hmasa berte chu ramria duty mek Mizoram police-te in ni," a ti a; duty-te chu rinawm leh inpe taka thawk tura chahin, a ṭula hman turin Rs. 10,000 a pe a ni.

R Lalzirliana chuan, Mizoram sorkarin ramri chei ṭhat a ngai pawimawh tih sawiin, "Electric ban phun pheina turin hmalak thuai tur a ni. Ramri lui hnaiha duty post siamte leh kawng thawm ṭhat hna thawh vat a ṭul," a ti. Assam lamin ramri pêla kawng an lài chu ram páwn aṭanga dan loa Assam rama lut rûa Mizoram hnaiha inkhuar tumte hmatheha mi ṭhenkhat politics khelhna hmanrua nia a lan thu a sawi.

Minister hian February 9, 2021-a ramria buaina thleng vanga P&E department-a thawktu leh khawtual mi hliam tuar, Bairabi damdawi-ina enkawl mekte a tlawh nghal.

R Lalzirliana hi deputy speaker Lalrinawma leh MLA dang pathum - Lawmawma Tochhawng, Ramthanmawia, Dr K Pachhunga leh H Lalzirliana te bakah, P&E chief engineer Vanlaltlana leh Bairabi khawtlang hruaitute'n an ṭawiawm a ni.