MNF sorkarin ramria a ngaihdan Central-ah an thlen ngam lo - ZLP

ZPM Legislature Party (ZLP) chuan nimin khan an leader Vanlalhlana hoin Aizawl Press Club-ah thuthar thehdarhtute an kâwm a; MNF kaihhruai Mizoram sorkar chu Mizoram ramri chin sorkar laipuia thlen ngam loah an puh.

ZPM MLA-te chuan, Ministry of Home Affairs (MHA)-in December 26, 2018 khan ramri chungchanga a ngaihdan a rang lama thawn turin Mizoram sorkar a ti a, chumi hnuah ṭum li hriattir nawnna (reminder) a rawn thawn leh tawh tih an sawi a, "Cabinet meeting-ah BEFR 1873 hnuaia Inner Line of 1875 a pawm tawh hnuah pawh an ngaihdan sawi ngam lo a, kan sorkar a ngawi reng hi a pawi hle a ni," an ti.

ZLP secretary Dr Vanlalthlana leh member C Lalsawivunga ten February 9, 2021-a Zophaia buaina thleng a hmuna an enfiahnaa an thil tawn leh hriatte an sawi a, "Assam lam aṭanga buaina chawh thawh a ni ziah hi a pawi kan ti hle. Hliamte kan tawrhpui tak zet a ni," an ti a; hliamte chu chhawmdawl a, an inenkawlna senso buaipuisak turin Mizoram sorkar an phût tih an sawi.

•    Ramri buai lai kan thlen hmain Assam Police Service (APS) mi, kan ram chhung, an intihbuaina hmun thlen hma daihah amahin a lo ding a, kal zel tawh lo tura min lo ti kha Zoram mipui an zah lohnaah kan ngai. Kan sorkar dawihzia chiang taka tilangtu a ni.

•    Assam aṭanga Inteligence Bureau miin party mi leh press ho hruaia kan ram chhunga an rawn kal ngam leh investigation ti tur anga an rawn insawi ngam kha a pawi tak zet. Mizoram sorkar remtihna nei lo leh min tihhmingchhiat tumna rilru nen an lo kal kha duh loin, kan lo hnawt let a ni.

•    Assam nena kan ramri hrúla chêngte tihhmasawn, tihchangtlun leh an himna ngaihtuah lamah nasa zawka hma la turin Mizoram sorkar kan ngen.

•    Kan ram venghim tura tirh, kan police-te'n kaihhruaina mumal an dawng lo leh ei leh in tur tak ngial pawh an nei lo kha a pawi. Function vela fak duah lo a, a hun takah, an mamawh huna an tana che chhuak ṭhin turin sorkar kan ngen.

•    1st IR police duty post hi Baibawn tlanga dah turin Mizoram sorkar kan ngen. Tuna an awmna aṭang hi chuan ramri vên a har a, kan mi leh sa tam tak tan a him tawh dawn lo. Mizo IR police awmna hmun sawn bakah, tam zawk dah leh thuam chak a ṭul.