COVID-19: Mizoram dinhmun Hripui vei mi 2 hmuh belh a ni

February 10, Nilaini khan Mizoramah Covid-19 vei mi pahnih hmuh chhuah a ni a, tualchhunga kái leh an kàina hriat loh ve ve an nih bakah, pakhatin Covid-19 symptom a nei. Nimin khan hripui laka fihlim tawh mi pahnih chhuahtir an ni.

Covid-19 vei Nilainia hmuh tharte chu Rapid Antigen Test (RAT) hmanga hmuh chhuah an ni a; ZMC laboratory leh TrueNAT-PCR hmanga swab sample endik zingah hripui vei an awm lo.

Hripui laka fihlîm tawh nimina chhuahtirte chu Durtlang BSUP CCC aṭanga chhuahtir mi pahnih an ni.

Mizoramah Covid-19 vei mi 4,390 hmuh chhuah a ni tawh a, mipa 3,213 leh hmeichhia 1,177 an ni. Nimin tlai dar 5 thleng khan mi 4,361 (99.34%) chhuahtir an ni tawh a, mi pakua (0.20%) thi tawhin, enkawl mek mi 20 (0.46%) an awm.

Nilaini khan ZMC laboratory-ah swab sample 62, TrueNAT-PCR hmangin Lunglei leh Champhai district-ah sample 32 leh RAT hmangin district pakuaah sample 507 endik a ni a; sample endik zawng zawng chu 601 niin, chu'ng aṭanga Covid-19 positive hmuh chhuah pahnih chu 0.33% a ni.

February 9, 2021 thlenga Mizorama swab sample endik tawh zat chu 2,18,043 a ni a, chu'ng aṭanga Covid-19 positive mi 4,390 chu 2.01% a ni. Hripui vei hmuh tawh zinga mi 2,080 chu Mizoram chhunga kái an ni a, mi 2,310 chu Mizoram páwn aṭanga an rawn luh hnua hmuh chhuah an ni thung.

Mizorama district 11 zinga district pariat - Siaha, Champhai, Kolasib, Serchhip, Mamit, Saitual, Khawzawl leh Hnahthial district-ahte Covid-19 vei an awm tawh rih lo. District pathum - Aizawl (13), Lunglei (3) leh Lawngtlai (4) district-ahte chiah hripui vei an awm rih a ni.

Lunglei Lunglawn - 1: Mipa kum 18, zirlai, hostel-a luh dawn vanga swab sample endik, hri kàina hriat loh, symptom nei lo.

Lawngtlai AOC Veng - 1: Mipa kum 18, symptom a neih vanga sample endik, hri a kàina hriat loh.