Mizoramin sorkar ṭha lo a hrawn mek Ram rorelna-ah in enchhin chi a ni lo - Congress party

Mizoram Pradesh Congress Committee (MPCC) hruaitute chuan nimin khan Aizawl Press Club-ah thuthar thehdarhtute an kâwm a; Mizoramin sorkar ṭha lo a hrawn mek niin an sawi a, "Ram rorelna hi inenchhinna hmun atana hman chi a ni lo," an ti.

Congress Legislature Party (CLP) deputy leader C Ngunlianchunga chuan, Mizoramin union territory a nih lai 1972 aṭangin sorkar chi hrang hrang a hrawn tawh thu sawiin, "Heng zingah hian MNF sorkar kan hrawn mek Pu Zoramthanga kaihhruai hi kil hrang hrang aṭanga thlirin fakna tur awm lo ber sorkar a ni hial àwm e," a ti a, MNF sorkar chu sum enkawlah an hlawhchham thu a sawi.

C Ngunlianchunga chuan, tuna sorkar anga sum leh paia tâlbuai sorkar an la awm ngai loh thu sawiin, "A tlaran zawnga ram rorelna an kalpui avangin Congress ministry liam tain sorkar sum leh pai uluk taka enkawl a, dinhmun him taka a lo dah tawh chu MNF sorkar hian a tichhe vek a ni," a ti.

CLP Deputy Leader chuan, MNF sorkarin sum thawh chhuah lam an ngaihtuah lo nia sawiin, "Congress sorkar khan Mizoram hi thawh chhuah nei state-a siam tumin theihtawp a chhuah a, MNF erawh chuan kutdawh state-ah min chhuah leh ta mek a ni," a ti a; sorkar ṭha lo siamtu MNF chu AMC-ah thlan nawn chi an ni lo tih chu an party ngaihdan a nih thu a sawi.

AMC inthlan turah ZPM-in, 'Min enchhin ve rawh u' tia an inzawrh mek thu sawiin C Ngunlianchunga chuan, "Kum 2010-2015 inkar AMC-ah khan Pu Lalduhoma pawl ZNP-te nen kum li leh a chanve sorkar kan siam a, kum chanve dang ZNP kaihhruai, ZNP-MNF-MPC AMC sorkar a ding leh. Khatih laia ZNP hruaitute tho kha tuna ZPM hruaitute an ni," a ti. 

MPCC hruaitute chuan, ZPM-a an hotu tam tak chu mipuiin an enchhin tawh, an duh loha an paih tawhte leh enchhin atana an thlan duh loh hnute an nih thu sawiin, "An hruaitu eng emaw zat chu an leader Pu Lalduhoma tiamin MLA ni tawh ṭhin an ni," an ti a; ZPM hruaitu MLA ni tawhte chu MLA chak leh ṭha bik an nih lohzia an bial mipuite'n an hria niin an sawi.

MNF-in Mizoram sum leh pai an enkawl dan leh AMC sum an tihchingpen nasat dante thlirin, hnâwl vat a ṭul nia sawiin MPCC hruaitute chuan, "ZPM pawh mipui tan enchhin tlak an ni lo tih a chiang. Mizoram hmasawnna lian tham zawng zawng deuh thaw thlentu Congress candidate-te thlang ṭheuh turin Aizawl mipui kan ngen a ni," an ti.

→    Mizorama sorkar awm tawh zingah sorkar hnathawkte hlawh pe thei lo a, pûksaktu hmasa ber an ni.

→    Sorkar hnathawk nghette hlawh a hun takah an pe thei lo a, group A, B, C leh D-te hlawh lak hun a inang thei tawh lo. AMC inthlan thlaah pawh sorkar hnathawk hlawh an la pe mumal thei lo. Group A leh B-te chuan February 9 velah January thla hlawh an la thei chauh.

→    Sorkar hnathawk hlawhte hi MNF sorkarin a pûksak fo.

→    MNF sorkar hnuaiah sorkar hnathawk pension-te'n pawisa chhuahpui tur an nei thei lo.

→    Contractor-te'n bill an la thei lo.

→    Sorkar hnathawkte'n GPF-a anmahni pawisa khawl sa pawh an la thei lo.

→    Mizoram sorkar Treasury office hrang hrangah ni tina bill pek chhuah theih zat a tlem.