ZPM-in 'Chibai Aizawl' hun an hmang

ZPM party chuan February 10, Nilaini zan khan Ignite Studio-ah AMC inthlan tur pualin 'Chibai Aizawl' tih hun buatsaihin, an candidate-te mipui hnena hmelhriattirna hun an hmang. He hunah hian ZPM vice president K Sapdanga leh leader Lalduhoma ten thu an sawi.

Lalduhoma chuan, candidate an neih ṭhat thu sawiin, "Mi ṭha thlanah Aizawl mipuite kan inzirtir mek a, mahse, an awmna páwlin a zir loh chuan mi ṭha pawh a ṭha tak tak thei lo. Congress sorkarna hnuaiah kohhran upa mi ṭha tak takte'n zu zawrh an thláwp a ngai. MNF sorkarna hnuaiah kan MP-in CAB thláwp zawngin a vote bawk. Hengte hi an mimal duh dan a nih ka ring lo, an awmna páwlin a nawr vang zawk a ni," a ti a; tuna MNF sorkarah pawh kohhran upa mi hêk chíng pali an awm thu a sawi.

AMC sum chu central aṭanga direct funding a nih thu sawiin Lalduhoma chuan, "Mizoram budget hi AMC-in a hmang dawn lo a, state own tax revenue erawh 15% an dawng ve ang, a bak chu Finance Commission aṭangin state finance department dâk-ina hmangin a dawng vek dawn a ni," a ti.

ZPM Leader chuan, "AMC-ah MNF an sorkar avangin AMC sum a pung dawn lo a, ZPM a sorkar avangin a tlahniam dawn hek lo," a ti a; mahni thuneihna pawh hmang ngam loa CM kawngka pawh kik ṭha ngam lo, pute tih lawm loh hlau sorkar Aizawl khawpuiin a neih a hlauhawm thu a sawi.

ZPM vice president K Sapdanga chuan, AMC term thumnaa councillor-te thlang turin Aizawl mipui an in peih thawkhat tih sawiin, "Kan khingpui MNF leh MPCC-te hian AMC-ah sorkarna an lo chelh ve ve tawh a, state-ah pawh sorkarna chherchhuan lo chelh tawhtute an ni. Chutih laiin, zár zo tur kan nei lo tih hre chungin ZPM chuan candidate ṭha tak tak kan nei a, hei hian mawm leh hlâwkna ûm ve lo an ni tih a tichiang," a ti. 

ZPM-in kalphung thar an aupui laiin mi ṭhenkhatin âtthlâk tia an sawi fo thu sawiin Sapdanga chuan, "Dik taka rorel tum hi âtthlak a nih ngai chuan, âthuai sorkar din kan tum a ni mai," a ti a; AMC-a âthuai sorkar din turin an candidate-te an rin tâwk thu a sawi.

ZPM Vice President chuan, party dangte tiam ve loh ward committee din an intiam tih sawiin, "Danin a phût ang taka ward committee dina hmasawnna hnathawh kan tum a, danin a phût ni si, kum 10 lai ward committee hnungkhirh a ni kha kan hrethiam thei lo," a ti.

Ward committee chu Mizote tan siam a ni ve lo anga sawi an awm thu sawiin K Sapdanga chuan, "Kum 2010-ah khan Mizoram sorkarin AMC kalphung atana dan a siamṭhat bung 2-naah chiang takin a lang," a ti a; dan ang taka kal tum ZPM chu enchhin turin Aizawl mipui a ngen a ni.