MṬKP-in fa neih tam inzirtir an rél

Mizoram Ṭhalai Kristian Pawl chuan nimin khan Lunglei Electric Veng biak-inah rorel vawi 67-na an nei a, fa nei tam tura inzirtir kawngah hmalak an rél.

MṬKP rorel inkhawmah Covid-19 léng avangin MṬKP Committee member-te bakah, bial aiawh mi pakhat ṭheuh telin, palai 115 an tel a; president Rev. C Vanlalmuankima'n a kaihruai. An rorel zingah fa neih tam inzirtir kawnga hmalak a tel bakah, ṬKP member-te'n rilru hrisel zawk an neih nan MṬKP anga hmalak te, Lungleiah ṭhalaite tan Youth Centre din tura hmalak dan kawng zawnte a tel a ni.

MṬKP-ah hian pastor bial 88-ah unit 420 an awm a, member 44,228 awmin, mipa 27,292 leh hmeichhia 16,936 an ni. Kum 2020 chhung khan kohhran dan puitlingin nupa tuak 436 an innei a, dan têa innei tuak 311 an awm bawk.

ṬKP-in Aizawl, Lunglei leh Lawngtlaiah blood donation calendar an siam a, kum kal ta chhung khan MṬKP hmingin thisen unit 1,528 pek a nih thu rorelah hian an tarlang.