ZPM candidate-te Rokunga thlânah

AMC inthlan tura ZPM candidate-te chuan nimin khan Mizo hla phuah thiam, Poet of the Century Rokunga thlàn, Mission Vengah Aizawl khawpui siamṭha tura inhlan tharna inkhawm an buatsaih a; ZPM vice president K Sapdanga leh leader Lalduhoma ten an hmanpui.

Lalduhoma chuan, Aizawl khawpui chu din thar leh a ngai tih sawiin, Rokunga phuah, 'Ka pianna Zawlkhawpui' tih hlaa 'Dikna a fam ta, felna a tláwm ta, nun suar ang a chim, tham leh bawlhhlawhnate'n tual an léng, awi maw a pawi em mai,' tih chu Zo fate Jerusalem Aizawl khawpuiah a thleng meka a lan thu a sawi.

Lalduhoma chuan, "ZPM hian AMC inthlana sorkarna kan siam a nih chuan, Pu Rokunga’n felna silhpuan sina tho leh tura min koh angin, tham leh bawlhhlawhnate tuallènnaa lo chang ta Aizawl khawpui hi tun din leh zái kan rél dawn a ni," a ti.

Inkhawmah hian kal khawmte chuan, Aizawl khawpui din thar leh turin Pathian chakna rin chhan chunga inhlanna leh intiamna an sawi rual a; Rebek Lalruatfeli kaihhruaiin 'Ka pianna Zawlkhawpui’ tih hla an saho bawk a ni.