District pathuma DC-te an inkâwm

Nimin khan Mamit bawrhsap Dr Lalrozama leh Assam-a Karimganj leh Hailakandi district bawrhsapte chu video conferencing hmangin an inkâwm a; Assam state-a Assembly inthlanpui neih chu rálmuang leh felfai taka kalpui theih dan tur an sawi.

Assam inthlanpui neih tur chu rálmuang leh tluang taka kalpui a nih theih nan a theih ang anga pui turin Karimganj leh Hailakandi DC-te chuan Mamit DC an ngen a; ramrî-ah dan loa zu/damdawi leh ruihhlo dang tawlh ruk ṭhinte uluk taka lo endik ṭhin turin Mamit DC an ngen a ni.

Mamit DC Dr Lalrozama chuan, boruak rálmuang leh muanawm tak hnuaiah inthlanna felfai leh thianghlim tak a awm theih nan a theih ang anga puih a inhuam thu a lo hrilh.

Inkawmnaah hian DC-te chu Mamit, Karimganj leh Hailakandi district-a SP-te'n an ṭawiawm a ni.