Hna chánte tana hmalakna thlirho
Chief secretary Lalnunmawia Chuaungo hoin nimin khan CS conference hall-ah Mizoram páwna hna thawk, Covid-19 vanga rawn hawte chhawmdawlna tura North Eastern Council (NEC)-in Mizoram sorkar hnena cheng nuai 300 a pek hmanga sorkar department hrang hrangte hmalak dan thlirho a ni.
Mizoram Youth Commission (MYC) secretary Donny Lalruatsanga tarlan danin, 'Livelihood Generation For Returned Migrants Workers Due to Pandemic Outbreak Covid-19 Phase-I' hmangin Commerce & Industries hnuaiah mi 550, Labour, Employment, Skill Development and Entrepreneurship (LESDE) hnuaiah mi 60, MZU Incubation Center hnuaiah mi 30 leh Mizoram Food Processing Research and Training hnuaiah mi 60-te hnenah kut themthiamna lam zirtir a ni tawh a; Tourism department hnuaiah tour guide training neih leh tum mek a ni bawk.
Livelihood Generation For Returned Migrants Workers Due to Pandemic Outbreak Covid-19 phase-II atana hmalakna tur NEC-in a pekte thlirho a ni. District tina DC-te kaihhruaina hnuaiah Skill Development Committee din ni se, an ti a, chumi kaltlang chuan cement mistiri, ei tur sâwngbàwl, vawk vulh leh cake siam zirna kalpui an rel a ni.