CAB hian tun hun leh nakin zelah Mizoram tan harsatna a thlen ang - Lal Thanhawla
Congress party president Lal Thanhawla chuan, The Citizenship (Amendment) Bill, 2016 (CAB) chuan tunah leh nakin zelah nasa takin Mizoram tan harsatna a thlen dawn niin a sawi.
Nimina Serchhipa vantlang inkhawmah thu sawiin Lal Thanhawla chuan, prime minister Narendra Modi sorkarin kum 2016 aṭangin Citizenship Act, 1955 tihdanglam tumin a kalpui thut tih a sawi a, "Congress party chuan sakhuana behchhana Hindu sakhaw betute tana hamṭhatna leh thlavâng hauhna a ni tih leh sakhuana kaihhnawih thila India citizenship nih theihna hi ṭha kan ti lo a, India Constitution a kalh tiin All India Congress Committee angin kan dodal nghal a ni," a ti.
MPCC President chuan, Lok Sabha-a CAB sawihona hmasa berah pawh Congress MP-te'n an dodal thu sawiin, "JD(U), AGP leh party dang pawhin min pui a, kan dodalna avangin zir chiang tur Joint Parliamentary Committee (JPC) din chhoh a ni. A bik takin Mizoram Chief Minister ka nihna bakah, Mizoram Congress sorkarin a duh loh thu ziakin ka thlen a ni," a ti a; India ram Chief Minister zinga CAB dodalna ziak hmasa ber a nih a rin thu a sawi.
Mizoram chu international boundary pahnih kárcheh a nih avangin foreigner kaihhnawih buaina nei thei reng a nih thu sawiin Lal Thanhawla chuan, "He bill hian tun leh nakin hun zela nasa taka harsatna a thlen tur state kan ni. Heti chunga JPC-in Mizoram dinhmun zir chiang duh ve loa Mizoram an rawn kal lohna hian 'Constitution Fundamental Rights- Art 14, Rights to Equality before Law' a bawhchhia a, ka rilru a tina hle. JPC member-te hi BJP MP team an ni," a ti.
NESO, MZP, NGO leh political party hrang hrangte'n CAB an dodal avanga a lawm thu sawiin Hawla chuan, "Parliament chhunga dan siam tur a nih avangin, Delhi-a Congress hruaitu te, MP Pu CL Ruala, Pu Ronald Sapa Tlau-te nen Parliament chhunga he Bill dan a nih theih dan tur kawng kan sawiho zel a, Lok Sabha-ah chuan kan dang bet zo ta lo," a ti a; Bill chu Rajya Sabha-ah paih a nih ngei theih nan hma an lak zel thu a sawi.
MPCC President chuan, Rajya Sabha-a CAB dinhmun tur sawi lâwk a harsat thu sawiin, "Hetih laia NE regional party ṭhenkhat, BJP-NDA, NEDA zawmtute Guwahati hmuna inhmukhawmte'n an rêl chhuah tura ka lo beisei chu, 'Rajya Sabha chhunga CAB ngaihtuah leh pass tura put luh a nih chuan NDA-NEDA kan zawmna kan titawp ang' tih a ni. Chutiang chuan ti ngam se chuan Parliament chhung leh páwn lama he Bill kan dodalnaah kawngro a sut ka ring," a ti.