Court-ah Lal Thanhawla a inlan

Kum 2013-a Mizoram Legislative Assembly inthlan dawna affidavit dik lo thehluta puh chief minister hlui Lal Than­hawla, Congress party president thubuai chu nimin khan Serchhip Dis­trict Court-ah ngaihtuah a ni a, March 6, 2019-a ngaihtuah chhunzawm leh tura dah a ni. 

Nimina thubuai ngaih­tuahnaah hian Lal Than­hawla chu Court-ah a inlan a, thubuai theh­luttu Lalhriatrenga Chhangte ukilte'n thu an zawtfiah. Lal Thanhawla chuan, kum 2013 inthlan dawnah Kolkata-a a ram chu neitu nihna document a la neih loh avangin affidavit-ah a ziah lan loh thu a sawi a, "Hetianga affidavit dik lo thehluta inpuhna hi mi rilru hruai pên tumna leh politics-a inbeihna niin ka hria," a ti. 

Thubuai hi March 6, 2019-ah ngaihtuah leh a ni dawn a, thurehtute chu Court-a inlan tura koh niin, Lal Thanhawla ukilte'n thu an zawtfiah ve thung dawn a ni.