Minister-in Kawng siam tur a enfiah

Aizawl East-II bialtu MLA Robert Romawia Royte, minister of state chuan nimin zing khan a bial chhung Armed Venga inkalpawhna kawng leh tui luankawr siam dan turte a enfiah.

Robert Romawia chuan, lei chê vangin Armed Vengah drainage system siamṭhat a ngai nasa tih sawiin, "Bial âwih, lei che area kan ni a, department hrang hrang mamawh tam bial kan ni. Tuiin min hawrh reng chuan kan daih rei dawn lo," a ti a; inkalpawhna kawng siamna tur chu a hnuaiah tui luankawr ṭha zawka siam theih a nih thu leh mimal ram lâk ngaite chu ram neitute'n a thlawna an pek phal thu a sawi.

Minister Robert Romawia hi AMC mayor PC Lalhmingthanga, UDPA, PWD leh PHE department hotute leh khawtlang hruaitute'n an ṭawiawm a; UDPA chu a rang lama sum mamawh ngai tur chhût chhuak tura tih an ni.