MZP-in sikul kai hun sawn tlai an duh lo

Mizo Zirlai Pawl (MZP) General Headquarters chuan thuchhuah siamin, tuna sikul kai hun sorkarin a hman mek chu ṭha an tih thu an tarlang a; sikul kai hun sawn tlai tum a nih chuan na taka dodal an tum thu an puang.

MZP hruaitute hi nimin khan an President kaih­hruaiin an ṭhukhawm a, sikul kai hun chungchang bakah, Zoram Ni leh Remna Ni hman dan turte an ngaihtuah. Thuchhuah siam nghalin, "Sikul ṭan hma chungchangah mipui leh zirlaite kan kal thiam hle tawh a, ram hmasawnna hmél thar leh ṭha zawk tura kan zuan luh mek lai a, hnungtawlh zawnga kal leh tumna a awm nia sawi rik a ni leh ta hi pawi kan ti tak zet. Sorkarin sikul ṭan hun a her danglam leh dawn a nih chuan, na taka dodal ni se kan ti," an ti a ni.

MZP chuan, Mizoram sorkarin sikul ṭan hun sawn tumin ngaihtuahna a séng ṭana an hriat thu sawiin, sikul ṭan hun tih hma leh tuna hman mek chu an dinna ngai reng a la nih thu an sawi a; hmasawn tura thawhrim a ngaihzia Mizo mipuite'n an hriat a, hmasawnna kawnga ke pên a ṭul thu sawiin, "Zirna-ina zirlaite pawhin he rilru hi an put theih nan sikul ṭan hun sawn hma hi ṭha kan la ti zel. Zinga rei tak tak mut hian hmasawnna a thlen lo a, sikul ṭan hma a nih hian chhung tinin taimakna leh hlawhtlinna kawng kan zawh a ni," an ti.

MZP thuchhuah chuan, ni ên chhung hman ṭangkai zawk a nih theih nan sorkar pisa ṭan hunte pawh sawn hma ni se tih chu MZP ngaihdan a la nih reng thu a sawi a; India hmarchhak bial tana time zone hran neih pawh an duh dan a la nih reng thu a tarlang.

MZP chuan, India si­paite'n kum 1966-a Aizawla bomb an thlak ni, March 5 chu uar lehzuala hman an tum thu an tarlang a; India sorkar leh MNF ten inremna an ziah ni, Remna Ni pawh Mizoram pumah ropui taka hman an tum thu an tarlang bawk.