Motor lei dan thar duan chhuah a ṭul - Transport Minister

Mizoram Transport Workers' Association (MTWA) chuan nimin khan Transport department conference hall-ah General Assembly an hmang a; khuallian, Transport minister TJ Lalnuntluanga chuan, traffic jam tihziaawmna atan motor lei dan scheme thar duan ṭula a hriat thu leh, Tahan (Myanmar) leh Churrachandpur (Manipur) thlenga MST bus tlantir tum a nih thu sawi.

Transport Minister chuan, Mizoram State Transport (MST) bus-te chuan chhan hrang hrang vangin hma a sâwn lo deuha a lan thu sawiin, Chief Minister kaihhruaina hnuaiah siamṭhat hna thawka hmalak a nih thu a sawi a, "Bus service hi inter-sate mai ni lo, kan ram ṭhenawm - Tahan leh Churachandpur thlenga service tura hmalak mek a ni. Road transport bakah, inland water transport system changtlung tak din tumin hma kan la dawn," a ti.

TJ Lalnuntluanga chuan, lirthei pung nasa chu hmasawnna a nih rualin, harsatna a thlen mek tih a sawi a, "Lirthei pung chak lutuk hian traffic congestion leh lirthei chetsualna nasa takin a thlen a. A hmasaah chuan motor lei dan scheme thar duan chhuah a ṭul a ni," a ti.

Lirthei register thar zingah two wheeler a tam ber tih sawiin Minister chuan, "State dangah chuan two wheeler lei turin driving licence a nei tur a ni tiin notification an chhuah. Lirthei chesual tam ber chu two wheeler a ni, a chhan nia lang chuan khalh thiam sa loin an lei a ni," a ti a; two wheeler lei tur chuan driving licence an neih ngei theihna atana hmalak an tum thu a sawi.

Mizoram sorkarin kum 2020-ah chuan accident vanga thihna thleng ṭhin 50%-a tihhniam a intiam tawhna chu chak taka bawhzui a nih tur thu sawiin TJ Lalnuntluanga chuan, "Kan harsatna zawng zawngte sukiang thei lo mah ila, kan department tan theihtawp ka chhuah zel ang," a ti. 

MWTA inkhawmpuiah hian an member thite sûnna hun hman a ni a, hruaitu thar an thlang nghal bawk.