CM Zoramthanga'n lump sum school-te Ṭanpuina tihpun a nih dawn thu a puang

Chief minister Zoramthanga chuan, a kaihhruai sorkarah zirna leh hriselna lam ngaih pawimawh zual a ni dawn tih a sawi a; lump sum aided school-te hnena sorkarin ṭanpuina a pek ṭhin chu tihpun a ni dawn tih a puang.

CM Zoramthanga hian nimin khan Tuikum MNF Block-in Thentlang khelmuala MNF sorkar thar lawmna an buatsaihah khual­lian niin thu a sawi a; sorkarin zirna leh mipui hriselna lam a ngaih pawimawh zual tur thu sawiin, "Sikul lump sum pawisa tihpun a ni ang a, zirna kawngah nasa takin hma thar lak a ni dawn. Health service kawngah pawh nasa taka hmalak thar kan tum a ni," a ti.

Zoramthanga chuan, "Sorkar hmasain kan kih hnawka an sawi sikul kan upgrate-te kha sava châwl lungmuang angin ke khatin an ding ṭâwk ṭâwk a, ke hniha nghet taka dintir kan tum. Zirtirtu indaih lohna nasa lutuk tihziaawm nan zirtirtu lak thar a ni ang," a ti a; zirna lama hnathawk dangte pawh lak belh a nih tur thu a sawi.

Chief Minister chuan zu zawrh chungchang sawiin, "Zu zawrh thu-ah hian kan tih theih phâk bakin thil a thleng leh rih a. Sorkar hmasa kih hnawk hi a thlum em a, ramin kan rûi ta a ni. March 31 a lo thleng ang a, zu khapna tur hi tihfel a ni tawh ang. Zu zawrh a ni leh ta rih hi mipui, kohhran leh ramin min hriathiam a ngai a ni," a ti.

MNF movement chu mi sâng tam martar-na a nih avang te, Mizo mipuite tawrhna leh Pathian a venna avangtein khawvelin an zah nia sawiin Zoramthanga chuan, "MNF nge nge, a danglam in tih turin he ram hi kalpui kan tum a, Zoram malsawmna hai chhuak turin theihtawp kan chhuah dawn a ni," a ti a; neitu sorkar leh mikhual sorkar chu a danglam nasa hle dawn niin a sawi.

School Education minister Lalchhandama Ralte pawhin thu sawiin, Mizoram zirna dinmun chu mi, damdawi-ina natna khumah na taka mu mek ang niin a sawi a, "Damdawi ṭha taka enkawl loh chuan a thih mai a hlauhawm. Zirtirtu hnawhkhah loh 2,000 chuang a awm a, peon leh chowkidar hnawhkhah loh pawh tam tham tak a awm," a ti a; sikul building leh hmanraw dangte pawh a chhe em em nia sawiin, "Sorkar hmasa hi dem loh hram kan duh a, mahse, 'Eng nge an lo tih aw' tih erawh a awl hle a ni," a ti.

Bialtu Lalrinawma, Assembly deputy speaker chuan, MNF kaih­hruai sorkar chu kohhrante ṭawng­ṭai chhuah a ni tih hre reng turin mipui a chah a; bial mipuite duhsaknaah lawmthu a sawi rualin, ṭawngṭaipui ṭhin turin a ngen a ni.