ATMA-in workshop an buatsaih

Directorate of Agriculture (Research & Extension) hnuaia Agricultural Technology Management Agency (ATMA) State Nodal Cell chuan nimin khan Synod Conference Centre-ah state level 'Workshop-cum-Exhibition’ an buatsaih a, Agriculture minister C Lalrin­sanga'n a hawng.

Agriculture Minister chuan, ATMA chu la rei lo mah se, an hmalaknain rah a chhuah tawh tih sawiin, "Kut hnathawktute hamṭhatna tura sorkar laipuiin agency hrang hrang kaltlanga ruahmanna a siamte tipuitling tur hian agency hnathawkte leh a kaihhnawih department-te'n ngaihtuahna séng chungin lo dawngsawng se ka duh," a ti.

Tunlaiah ram hlutna leh hnam zahawmna chu sum leh pai dinhmunah a innghat tawh nia sawiin C Lalrinsanga chuan , "Sorkar leh mimal anga hmalakna zawng zawngin sum leh paia intodelh a tinzâwn ngei tur a ni," a ti a; workshop-a telte chuan Mizoram intodelhna tur thil pawimawh an zir chhuah a, a hlâwkna a taka hmuh ngei theih a beisei thu a sawi.

MLA F Lalnunmawia, MLA pawhin thu sawiin, sorkar laipuiin kut hnathawktute tana ruahmanna a siam tawh zingah ATMA chu a hlawhtling bera sawi theih niin a sawi a, "Mizoramah agriculture mithiamte'n lo neitute vawi eng emaw zat training pein, department hnuaia demonstra-tion farm-a training pek laia hlawhtlinpui em em si, a taka farmer-te'n an hman zui lohna chhan hi zir chian a ṭul," a ti.

Workshop hawnnaah hian ATMA hmalakna hrang hrang hlawhtling taka kalpui leh hna thawk ṭhate hnenah chawimawina hlan a ni.

State level best farmer atana thlan Lalchhana, Buh­changphai (Agriculture), Vanlalṭhafamkima, Champhai Vengthlang (Horticulture), F Lalrawngbawla, Lungkawlh (AH&Vety), Hmangaihthanga, Serchhip (Fisheries) leh V Sangluaia, Chhiahtlang (Sericulture)-te hnenah Rs. 1,00,000 ṭheuh pek a ni.

ATMA-a thawkte'n an district ṭheuha lo neitu ṭha an thlan - Lalmalsawma - Aizawl district, Biakhmingthanga - Lunglei - district, JV Lalremruata - Siaha district, Dajied Lalthlamuana Betlu - Champhai district, Rambuatsaiha - Kolasib district, Lalremruata - Serchhip district, Moses Zonunsiama - Lawngtlai district leh K Lalhmasawna - Mamit district-te hnenah Rs. 15,000 ṭheuh pek a ni bawk.