Thlawh khûm policy kan ti ve dawn lo - Lalchamliana

Home minister Lal­chamliana chuan, Zoram­thanga kaihhruai MNF sorkarin mipui huapzo sorkar siam an tum tih sawiin, "Thlawh khûm policy kan ti ve dawn lo," a ti.

Lalchamliana hian nimin khan East Lungdar khuaa MNF sorkar thar lawmna inkhawmah thu sawiin, "MNF chuan hna a thawk ṭha tur a ni a, a hnaah a rinawm tur a ni a, tehnaah a tling tur a ni a, Pathian malsawm tlak a ni tur a ni," a ti a; mipuite chu democracy hlutzia hria a, ramin remna leh muanna a neih mek chhawm nung zel turin a sáwm.

Minister chuan, sorkarin mipui tana scheme hrang hrang a siamte chu huapzo taka a kalpui dawn thu sawiin, "Kan mi leh sa an nih loh vanga kal kân mai loin, huapzo sorkar hnuaiah ram hmasawn nan hna kan thawk zel ang. Bial chhung leh ram hmasawnna tur tak taka hnathawh kan tum avangin dik tak leh rinawm taka hna kan thawh zel theih nana min ṭawngṭaisak thin turin ka sawm che u a ni," a ti.

Lalchamliana hian MLA a nih theih nan puitute leh amah thlangtu mipui chungah lawmthu a sawi a ni.