Covid-19 vei rinhlelh mi pali ZMC-ah dah luh thar an ni
Covid-19 veia rinhlelh mi pali an awm thar a, nimin khan State Referral Hospital/ ZMC-ah dah luh an ni. Hetih lai hian, ZMC-a Covid-19 testing laboratory din thar chu vawiin hian Health Minister-in a hawng dawn.
Sorkar thuchhuakin a tarlan danin, Covid-19 vei rinhlelh tharte hi low risk ward leh high risk ward-ah pahnih ve ve dah an ni. ZMC-a rinhlelh admit tawh hi mi 19 an ni a, heng zinga mi pasarih chu an la awm mek a, mi 12 an chhuak tawh.
ICU-a enkawl mek Covid-19 vei chu a dinhmun a la ngai rih niin Vanglaini chuan thu a dawng. ZMC-a Covid-19 testing laboratory bun thar chu vawiin hian Health minister Dr R Lalthangliana'n a hawng dawn a, a taka hman theih thuai beisei a ni. Laboratory enkawl turin mi pathum lak belh nghal a ni.