MUP harsatna nei ṭanpui tiam

Mizoram Upa Pawl (MUP), Durtlang chuan nimin khan an venga MC Hall-ah Annual Meeting an nei a; an hun hmanpuitu bialtu MLA Vanlalhlana chuan, MUP member doctor ràwn mamawh, harsatna neite ṭanpui a tiam.

Vanlalhlana chuan, MUP member-te chu rei tak an dam theihna atan an hriselna vawng ṭha a, doctor râwn uar turin a chah a, "Doctor râwn mamawh, harsatna neite chu MLA fund aṭangin ka ṭanpui ang che u. Hriselna ṭha tak nei a, mi dampui reng hi kan mamawh a ni," a ti.

Mizo hnam tana rintlak leh rawn tlak MUP an awm chu van­neihthlak a tih thu sawiin Vanlalhlana chuan, "Mizo kan nihna tarlangtu inunauna, inpeizàwn ṭhin kan nihnate hi upate min uapna aṭanga kan hmuha kan chhawm a ni," a ti a; upate chu rohlu an nih thu a sawi.