Education Policy ṭha tak kan duang - Duhoma

ZPM Legislature Party leader Lalduhoma chuan nimin khan a bial chhung, Thenzawl khuaa Don Bosco School-in Parents Day-cum-Don Bosco Day an hman a hmanpui a; thu sawiin, ZPM-in Education Policy ṭha tak an duan thu a sawi.

Mizoramah sorkar sikul khâr ngai kum tin an awm belh zel tih sawiin Lalduhoma chuan, "Chuvangin, kohhran sikul leh mimal sikulte hi man tláwm zawka naupangte an luh theihna turin sorkar budget aṭanga ṭanpuina chu pek ni se a ṭha a, chutiang tur chuan ZPM-in Education Policy ṭha tak kan duang a ni," a ti.

Lalduhoma chuan, "Mihring kan nih chhungin kawng tinrengah zirna a pawimawh a, human resource a pawimawh a, tunlai khawvelah politics khel tur pawhin zirna leh kawng tin renga hmasawn a ngai a ni," a ti a; tunlai mila hmasawn ve zel a ṭul thu a sawi. MLA hian Don Bosco School, Thenzawl website www.donboscothenzawl.com chu a hawng nghal a ni.

Don Bosco School, Thenzawl hi kum 2015-a din a ni a, pawl 10 thleng zir theihna a ni.