CM thusawiah ZPM ṭhalai an lawm

Zoram Peoples' Movement (ZPM) ṭhalaite chuan thuchhuah siamin, January 30, Nilainia Horticulture Department Officers Meeting-ah chief minister Zoramthanga’n 'Mizoram khawizu leh hnute tui luanna rama siam' a tum thu a puang chu lawmawm an tih thu an tarlang.

ZPM ṭhalaite chuan, Zoramthanga'n 'Khawizu leh hnute tui luanna rama Mizoram siam' a tum chu chief minister a nih hmasak ṭuma Mizoram, Switzerland of the East-a siam a tumna thâmral ta ang a nih loh an beisei tlat thu an sawi a, "Pu Zoramthanga’n Pathian hnena ṭawngṭaia dil ngai tawh lo khawpa kan ram leilung hausakna a tâwk hle tia a puan erawh hi chu ZPM ṭhalaite chuan Pathian a zahawm kan ti hle a ni," a ti.

ZPM ṭhalaite chuan, kalphung thar hmanga ZPM-in Zoram thar siam tuma a hmalakna tura a hmachhawp - tuikhuah (hydel project) leh ni zung (solar power) hmanga kawlphethaa intohdelh tura a rua­hmannate chu ram into­delhna atan thil ṭul tàwp­khâwk a nih thu an sawi a; hlawhtling taka hlen chhuah a nih theih nan Zoram mipuite thawhpuiah an sáwm a ni.