KHAWTHLIR

Inter Collegiate Youth Adventure Club chuan nimin khan blood donation camp huaihawtin, Aizawl Civil Hospital tan thisen unit 67 an pe a, a petute mipa 53 leh hmeichhia 14 an ni. Aizawl Kanan Unit ṬKP-te pawhin Aizawl Civil Hospital-ah thisen unit kua an pe a, a petute mipa pasarih leh hmeichhia pahnih an ni.

January 30, Nilaini khan Mizoram University-ah North East Central University Administrative Employee Federation (NECUAEF) inkhawmpui neih a ni a, India hmarchhaka central university-a non teaching staff-te thawhhona leh an hmakhua an sawiho. NEUCUAEF hi hmarchhaka central university-a administrative employee intêl khawmna a ni.

Aizawl District Emergency Operation Centre sak thar chu, nimin khan Aizawl bawrhsap D. A Muthamma-i'n a hawng. Centre hi chhiatrupna thlen thulha hman ṭangkai tur bungraw hrang hrang leh chhanchhuahna hna thawk thei tur quick response team (QRT)-te nena thuam a ni a; chhiatrupna a thlen thulhin toll free number 1077 leh mobile number 9436743346-ahte biakpawh theih reng a ni.

Mizoram Bar Association (MBA) chuan nimin khan an room-ah General Body Meeting an nei a; hruaitu thar thlangin, president-ah LH Lianhrima, vice president-ah Zochhuana, general secretary-ah R Lalhmingmawia, assistant secretary-ah H Lalremsanga, treasurer-ah Linda Fambawl leh finance secretary-ah Lalzuiliana te an thlang.

CADC-a MDC-te chuan nimin khan CADC chairman atan Kamalanagar South biala thlan tlin H Amaresh Chakma chuhtu awm loin an thlang. Chairman ṭhin Buddha Lila Chakma chu January 14, 2019 khan no confidence motion hmangin paih a ni.

Dil theih Health department 

chuan, Depuy International Ltd., UK siam hmanrua hmanga khêl ruh thlâk (implant) tawh, a hnu lama insawiselna neite tan zangnadawmna dilna tur State Level Committee for Faulty ASR Implant manufactured by M/s Depuy International Ltd.UK din a nih thu an tarlang. Hre chiang duhte tan Health Principal Director emaw, Hospital & Medical Education Director officer-ah emaw zawhfiah theih a ni.