ICFAI University gate kalh avangin zirlaite leh thawktute an lut thei lo

ICFAI University-a thawkte leh zirlaite chu nimin khan class kal tumin an campus an pan a, mahse, campus gate pui a inkalh avangin an lut thei lo a ni. Zirlaite leh thawktute chuan, gate kalh a nih chhan an hriat loh thu sawiin, "Gate kalh chhan hi sawifiah turin thuneitute kan phût. ICFAI University adviser Dothanga, vice chancellor mawhphurhna la mektuin gate hi kalh turin Registrar a hriattir niin kan hria," an ti.

Gate-a security duty-te chuan Vanglaini palai zawhna chhangin, ICFAI University gate chu April 14, 2019 zanah thuneitute'n kalh tura an tih angin an kalh a, a hma aṭangin thawktute'n thuneitute room pathum chu an lo kalhsak tawh bawk niin an sawi.

ICFAI University-a faculty (zirtirtu)-te sawi danin, August 14, 2019 thleng class an kal a, mahse, hun eng emaw ti chhung chu class kal chungin lehkha an zir tawh lo a, attendance erawh an la a ni. August 15 chu Independence Day a nih avangin chawlh a ni a, August 16, Zirtawpni-ah sorkar thuneitute nen thil pawimawh sawiho a nih avangin zirlaite chawlhtir an ni. Inrinni leh Pathianni a nih zui avangin, August 14 hnua class an kal leh theih hmasa ber chu nimin kha a ni.

Vanglaini palai zawhna chhangin thawktute chuan, hun rei tak aṭangin harsatna an nei tawh a, lungawi lohna pawh zirlaite'n an lantir fo tawh tih an sawi a, "Kan vice chancellor a bàn avangin adviser-ah May 2019 khan Mizo pa ngei Pu Dothanga an dah a, a hnuah vice chancellor mawhphurhna pek a ni a, Mizo pa ngei hotuah a awm avangin kan lawm hle. Pu Dothanga hnenah kan harsatnate kan thlen ṭhin a, mahse, awmzia a awm lo; keini Mizote lamah 

ṭang loin, ICFAI thuneitute lamah a ṭang niin kan hria," an ti.

An harsatna chungchang chu Mizoram sorkarah pawh an thlen fo tawh tih sawiin thawktute chuan, "Kan thlen ngun. Higher & Technical Education (HTE) Minister pawh kan hmu ṭhin a, Chief Minister pawh min hmuhsak tawh," an ti a; mahse, tun thlengin awmzia a la nei lo tih an sawi.

ICFAI University-a thawkte sawi danin, an harsatna zir chiangtu turin May 2019 khan Chief Secretary kaihhruai Study Group din a ni a; Study Group din a nih aṭangin thla thum a kal tawh a, an hmalak dan an la hre rih lo.

Thawktute chuan, tun hnaiah ICFAI Society Board hotute Mizoramah an rawn kal tih sawiin, "Chief Secretary hoin kan inkâwm a, chutah chuan ICFAI Society hotute chuan sum a awm loh thu an sawi a, 'Kan la rawn bàn zel dawn che u,' tiin an sawi hial," an ti. Mizoram HTE department hotute'n hmun danga ICFAI University-te pawh an zir chiang tawh a, state dangah pawh an buai tih hriat a nih thu sawiin, "ICFAI Society hi a tla­chhia niin kan hria. Chief Minister pawhin 'In daih rei dawn lo,' tiin min hrilh tawh a ni," an ti.

University gate chu chawhnu dar khat velah Dothanga thupeka hawn a ni a, class erawh lak a ni lo. ICFAI University Mizoram Employees Forum chuan August 8 khan Aizawl Press Club-ah press meet neiin, an lung­awi lohnate an lo puangzar tawh a; thawktute'n May thla aṭangin hlawh an la tawh lo tih an sawi.

An sawi danin, July 29, 2019 aṭanga supplementary exam an neih mek laiin, July 30-ah teaching staff pangate chu thuneitute'n an bàn a, bànte zingah chuan Campus Head (Academic Head) leh Deputy Controller of Examinations pawh an tel a; chuvang chuan supplementary exam neih mek chu August 1 aṭangin an titawp a ni. Chumi hnuah lehkha zir mumal a awm tawh lo a, class kal mah se, attendance an lak bak chu lehkha an zir lo a ni.